नेपाल उद्योग परिसंघ कोशीका वरिष्ठ उपाध्यक्ष प्रकाश मुन्दडाले स्पष्ट सरकारी दृष्टिकोण र कार्यान्वयनबिना लगानीकर्ताले निर्णय गर्न नसकेको बताएका छन् ।
विराटनगर — नेपाल उद्योग परिसंघ कोशी प्रदेशका वरिष्ठ उपाध्यक्ष प्रकाश मुन्दडाले बलियो र स्थिर सरकार, पर्याप्त विदेशी विनिमय सञ्चिति तथा दशककै न्यून ब्याजदर हुँदासमेत निजी क्षेत्रको मनोबल बढ्न नसकेको बताएका छन् । व्यवसायी अहिले पनि ‘पर्ख र हेर’ को अवस्थामा रहेको उल्लेख गर्दै उनले लगानीकर्ताले निर्णय गर्न नसकिरहेका कारण मुलुकले ठूलो आर्थिक मूल्य चुकाइरहेको बताए ।
कान्तिपुर मिडिया ग्रुपले कोशी प्रदेशको विराटनगरमा आयोजना गरेको ‘उज्यालो पूर्व : सम्भावनाबाट समृद्धितर्फ’ कार्यक्रमको पहिलो सत्र ‘व्यवसायीको मनोबल कसरी उकास्ने’ विषयमा मुन्दडाले सरकारले लगानीको वातावरण बनाउन स्पष्ट दृष्टिकोणसहित काम गर्नुपर्ने बताए । उनका अनुसार कुनै घटनाले लगानीकर्ताको मनोबल घटाउने र कुनै घटनाले बढाउने गर्छ । अहिले सरकारले राम्रो लगानीको वातावरण बनाउने सोचका साथ काम गर्ने हो भने निजी क्षेत्र पनि लगानी विस्तार गर्न तयार हुने उनको भनाइ छ । ‘सरकारले व्यवसाय गर्ने वातावरण बनाउने हो भने मात्रै अर्थतन्त्र सबल हुँदै जान्छ । सरकारको सोच, दृष्टिकोण र त्यसअनुसारको कार्यान्वयनले नै यो सम्भव हुन्छ । सरकारले बाटो बनाएमा व्यवसाय पनि सँगसँगै कुद्छ,’ उनले भने ।
कार्यक्रममा अर्थमन्त्रीले व्यक्त गरेका धारणाले आम लगानीकर्तामा केही सकारात्मक सन्देश पुगेको उनले बताए । अर्थमन्त्रीले घोषणा गरेका योजना कार्यान्वयनमा गए आगामी दिनमा अर्थतन्त्रमा सुधार हुँदै जाने उनको विश्वास छ । अर्थमन्त्रीले अर्को आर्थिक सुधारको प्याकेज अघि बढाएको र केही साताभित्रै अन्तरिम आर्थिक उपाय घोषणा गर्ने तयारी गरिरहेको बताएका थिए । सरकारले ती योजना कार्यान्वयनमा लैजान सके लगानीकर्ताको मनोबल बढाउन सहयोग पुग्ने मुन्दडाको भनाइ थियो ।
व्यवसायी अहिले ‘पर्ख र हेर’ को अवस्थामा रहे पनि नेपाल लगानीका लागि अवसर भएको मुलुक रहेको उनले बताए । विशेषगरी प्राकृतिक र धार्मिक पर्यटनलगायतका क्षेत्रमा सम्भावना रहेको उल्लेख गर्दै त्यसलाई उपयोग गर्न अनुकूल व्यावसायिक वातावरण आवश्यक रहेको उनको धारणा थियो । मुन्दडा मोरङ उद्योग व्यापार संघका पूर्वअध्यक्षसमेत हुन् ।