अर्थमन्त्री स्वर्णिम वाग्लेले लगानीको वातावरण सुधार, निजी क्षेत्रको विश्वास पुनःस्थापना र उत्पादनमुखी अर्थतन्त्र निर्माणलाई सरकारको प्राथमिकता रहेको बताए ।
विराटनगर — अर्थमन्त्री डा. स्वर्णिम वाग्लेले तत्कालीन आर्थिक संकट व्यवस्थापनसँगै अर्थतन्त्रका संरचनागत समस्या समाधान गर्न सरकार केन्द्रित रहेको बताएका छन् । लामो समयदेखिको आर्थिक शिथिलता, कमजोर निजी लगानी, उत्पादन क्षेत्रको सीमित विस्तार र रोजगारी अभाव अर्थतन्त्रका प्रमुख चुनौती रहेको उल्लेख गर्दै उनले लगानीको वातावरण सुधार र निजी क्षेत्रको विश्वास फर्काउने कामलाई प्राथमिकता दिएको बताए ।
कान्तिपुर मिडिया ग्रुपले शुक्रबार विराटनगरमा आयोजना गरेको ‘उज्यालो पूर्व : सम्भावनाबाट समृद्धितर्फ’ कार्यक्रममा अर्थमन्त्री वाग्लेले अर्थतन्त्रको विद्यमान संरचनालाई रूपान्तरण गर्नुपर्ने आवश्यकता औंल्याए । ‘उपभोग जति सबै आयात, आम्दानी जति विप्रेषण र लगानी जति घरजग्गा’ भन्ने सरलीकृत आर्थिक मोडलबाट माथि उठेर उत्पादनमुखी अर्थतन्त्र निर्माण गर्नुपर्ने उनको भनाइ थियो ।
निजी क्षेत्रले लामो समयदेखि नीतिगत अनिश्चितता, प्रशासनिक झन्झट र लगानीको प्रतिकूल वातावरण भोग्दै आएको उल्लेख गर्दै उनले लगानीमैत्री वातावरण निर्माण सरकारको प्राथमिकतामा रहेको बताए । सरकारले जिम्मेवारी सम्हाल्दा अर्थतन्त्रमा विद्यमान चुनौतीसँगै विश्वव्यापी द्वन्द्व, ऊर्जा बजारको अनिश्चितता र अन्तर्राष्ट्रिय आपूर्ति शृंखलामा आएको अवरोधले थप दबाब सिर्जना गरेको उनले बताए । त्यसैगरी, भोटेकोशी बाढीले जनजीवन, पूर्वाधार र आर्थिक गतिविधिमा थप चुनौती थपेको उनको भनाइ थियो । ‘हामीले दुईवटा जिम्मेवारी निर्वाह गर्नुपरेको छ । तत्कालीन संकट सम्हाल्ने र अर्थतन्त्रलाई दीर्घकालीन रूपमा कमजोर बनाइरहेका संरचनागत समस्याको समाधान गर्ने,’ उनले भने ।
वर्षौंदेखि जरा गाडेका विकृति र संस्थागत कमजोरी केही महिनामै अन्त्य नहुने भन्दै उनले सुधारको प्रतिफल देखिन समय लाग्ने बताए । तर संकटका बीचमा पनि सरकारले सुधारको गति नरोकेको उनको दाबी थियो । आर्थिक स्थायित्व कायम राख्दै लगानीको विश्वास फर्काउने, सार्वजनिक संस्थाहरूको कार्यशैली परिवर्तन गर्ने र उत्पादनशील अर्थतन्त्रको आधार तयार पार्ने कामलाई सँगसँगै अघि बढाइएको उनले बताए ।