यो जित पाकिस्तानका लागि आईसीसी विश्व टेस्ट च्याम्पियनसिपको २०२५–२७ चक्रमा पहिलो सिरिज जितसमेत हो । खेलमा तीव्र गतिका बलर मोहम्मद अब्बासले उत्कृष्ट प्रदर्शन गरे । उनले दुवै इनिङ्समा गरी ६ विकेट लिए ।
काठमाडौँ — पाकिस्तानले श्रीलंकाविरुद्धको दोस्रो टेस्टमा ८ विकेटको जित निकालेको छ । रावलपिन्डीमा शुक्रबार सम्पन्न दोस्रो टेस्ट जितेसँगै पाकिस्तानले दुई खेलको सिरिज १–० ले आफ्नो पक्षमा पारेको हो । पहिलो टेस्ट ड्र भएको थियो ।
यो जित पाकिस्तानका लागि आईसीसी विश्व टेस्ट च्याम्पियनसिपको २०२५–२७ चक्रमा पहिलो सिरिज जितसमेत हो । खेलमा तीव्र गतिका बलर मोहम्मद अब्बासले उत्कृष्ट प्रदर्शन गरे । उनले दुवै इनिङ्समा गरी ६ विकेट लिए ।
रावलपिन्डीमा खेलको पहिलो दिन श्रीलंकाले निकै निराशाजनक ब्याटिङ गर्दै ९८ रनमा अलआउट भयो । पाकिस्तानका मोहम्मद अब्बास, रजाउल्लाह र आमेर जमालले समान तीन–तीन विकेट लिँदै श्रीलंकाको ब्याटिङ धराशायी बनाएका थिए ।
जवाफमा ब्याटिङ गरेको पाकिस्तानले भने पहिलो इनिङ्समा ३२५ रन बनायो । यससँगै पहिलो इनिङ्समा पाकिस्तानले २२७ रनको विशाल अग्रता बनाएको थियो। पाकिस्तानका लागि गाजी घोरीले सर्वाधिक ५४ रन बनाए । श्रीलंकाका लाहिरु कुमारा एक्लैले ५ विकेट लिए ।
दोस्रो इनिङ्समा भने श्रीलंकाले केही सुधारिएको प्रदर्शन गर्दै ३ सय १६ रन बनायो । चौथो दिन ३०९ रनमा ९ विकेटको स्थितिबाट खेल सुरु गरेको श्रीलंकाले थप ७ रन जोड्दै सबै विकेट गुमाएको थियो । मिलान रथनायके ६६ रनमा अविजित रहे । कुशल मेन्डिसले ५३ तथा सोनल दिनुषाले ५४ रन बनाए । पाकिस्तानका लागि बलिङमा मोहम्मद अब्बास र आमेर जमालले समान ३–३ विकेट हात पारे ।
जितका लागि पाकिस्तानले पाएको ९० रनको लक्ष्य १३ ओभरमै दुई विकेट गुमाएर पूरा गर्यो ।
पाकिस्तानले यसअघि सन् २०२४ अक्टोबरमा घरेलु मैदानमा इंग्ल्यान्डलाई २–१ ले हराउँदै टेस्ट सिरिज जितेको थियो । त्यसयता पहिलोपटक टेस्ट सिरिज जित्दै पाकिस्तानले लामो समयको प्रतीक्षा समाप्त गरेको छ ।
सुबास रोकाया कान्तिपुर टिभीका संवाददाता हुन् ।