शव नभेटिए पनि परिस्थितिजन्य प्रमाणका आधारमा हत्या पुष्टि, अभियोजन पक्षले करिब १०० साक्षी र ५०० प्रमाण प्रस्तुत गरेको थियो।
काठमाडौँ — नेपाली मूलकी ममता काफ्ले भट्टको हत्या अभियोगमा उनका पति नरेश भट्ट अमेरिकाको भर्जिनियास्थित अदालतबाट दोषी ठहर भएका छन् । प्रिन्स विलियम काउन्टी सर्किट अदालतको जुरीले मंगलबार नरेशलाई प्रथम श्रेणीको हत्या, शव लुकाउने तथा नष्ट गर्ने र मृत शरीर विकृत बनाउने अभियोगमा दोषी ठहर गरेको हो । करिब छ सातासम्म चलेको सुनुवाइपछि १२ सदस्यीय जुरीले झन्डै पाँच घण्टाको छलफल गरी सर्वसम्मत फैसला सुनाएको थियो ।
फैसलापछि नरेशलाई सजाय निर्धारण नभएसम्म धरौटीमा रिहा गर्न अदालतले अस्वीकार गरेको छ । उनको सजाय सन् २०२७ मार्च १२ मा निर्धारण हुने तय भएको छ । भर्जिनियाको कानुनअनुसार प्रथम श्रेणीको हत्यामा २० वर्षदेखि आजीवन कारावाससम्म सजाय हुन सक्छ । शव लुकाउने तथा नष्ट गर्ने र मृत शरीर विकृत बनाउने अभियोगमा भने प्रत्येकमा अधिकतम पाँच वर्षसम्म कैद हुन सक्ने सीएनएनले जनाएको छ ।
मुद्दाको सुनुवाइका क्रममा अभियोजन पक्षले विषविज्ञान विशेषज्ञ, नरेशका पूर्वरूममेट तथा ममताका साथी र सहकर्मीसहितका साक्षी प्रस्तुत गरेको थियो । अभियोजन पक्षले करिब १०० जना साक्षी र झन्डै ५०० वटा प्रमाण अदालतमा पेस गरेको थियो । ती प्रमाणमा फरेन्सिक विश्लेषण, डिजिटल गतिविधि, खरिदका विवरण तथा घटनासँग सम्बन्धित अन्य सामग्री समावेश थिए ।
ममताकी साथी सुनिता बस्नेत थापाले अदालतमा बयान दिँदै उनी आत्महत्या गर्ने स्वभावकी नभएको बताएकी थिइन् । ममताले आफूलाई मार्ने कुरा कहिल्यै नगरेको र आत्महत्या गर्ने सोच व्यक्त नगरेको उनको भनाइ थियो । उनले ममताको अनुहारमा चोटसमेत देखेको बयान दिएकी थिइन् । ममताकी आमा, भाइ र अन्य साथीहरूले पनि उनीमाथि घरेलु हिंसा भएको बताएका थिए ।
अभियोजन पक्षले नरेशले हत्या पूर्वनियोजित रूपमा गरेको दाबी गर्दै सन् २०२४ मार्च २१ मा श्रीमती हराए के हुन्छ भन्ने विषयमा फोन र कार्यालयको ल्यापटपमा खोजी गरेको विवरण अदालतमा प्रस्तुत गरेको थियो । ममता सम्पर्कविहीन भएको समयमा नरेशले फोहोरका झोला, पञ्जा र सरसफाइका सामग्री खरिद गरेको दृश्यसमेत अदालतमा देखाइएको थियो ।
फरेन्सिक विश्लेषकहरूले घरभित्र भेटिएको रगत ममताको भएको विश्वास गरेका थिए । अभियोजन पक्षले यी प्रमाणलाई ममताको हत्या भएको र त्यसपछि शव लुकाउने प्रयास गरिएको दाबी पुष्टि गर्ने आधारका रूपमा प्रस्तुत गरेको थियो । शव फेला नपरे पनि परिस्थितिजन्य प्रमाणले हत्या भएको निष्कर्षमा पुग्न सकिने अभियोजन पक्षको तर्क थियो ।
नरेशले भने ममताले आत्महत्या गरेको दाबी गर्दै आएका थिए । सीएनएनका अनुसार उनले सुनुवाइका क्रममा ममताको शव टुक्र्याएर लुकाएको स्वीकार गरेका थिए । तर, हत्या गरेको भने अस्वीकार गर्दै आत्महत्यापछि शव व्यवस्थापन गरेको बताएका थिए ।
अन्तिम बहसका क्रममा नरेश पक्षकी वकिल ट्रेसी लेनक्सले अभियोजनले हत्या पूर्वनियोजित भएको प्रमाणित गर्न नसकेको जिकिर गरेकी थिइन् । उनले जुरीसमक्ष अभियोजन पक्षका प्रमाणले आरोप शंकाभन्दा पर पुगेर पुष्टि नगरेको भन्दै शंका भए निर्दोष ठहर गर्नुपर्ने तर्क गरेकी थिइन् । अभियोजन पक्षकी वकिल क्याथरिन विलियम्सले भने नरेशको आत्महत्या सम्बन्धी स्पष्टीकरण हास्यास्पद रहेको बताउँदै प्रस्तुत प्रमाणले हत्या पुष्टि गर्ने जिकिर गरेकी थिइन् ।
अन्ततः जुरीले अभियोजन पक्षका प्रमाण र साक्षीका बयानलाई स्वीकार गर्दै नरेशलाई तीनै अभियोगमा दोषी ठहर गरेको हो । फैसलापछि अभियोजन पक्षले जारी गरेको वक्तव्यमा यस निर्णयलाई ‘न्यायको एउटा महत्त्वपूर्ण मापन’ भनेको छ । ममताका निकट साथी तथा पूर्वसहकर्मी हली विर्थले अभियोजक र प्रहरीप्रति धन्यवाद व्यक्त गरेकी छन् ।
ममता सन् २०२४ जुलाई २७ मा कार्यस्थलमा अन्तिमपटक देखिएकी थिइन् । त्यसपछि उनी सम्पर्कविहीन भएकी थिइन् । नरेशलाई सन् २०२४ अगस्ट २२ मा पक्राउ गरिएको थियो । उनी बेपत्ता भएपछि घटनाको अनुसन्धान सुरु भएको थियो र पछि नरेशमाथि पत्नीको हत्या गरी शव लुकाएको लगायतका अभियोग लगाइएको थियो ।
फैसलाले ममताको हत्या भएको र त्यसमा नरेशको संलग्नता रहेको निष्कर्ष निकाले पनि उनको शव कहाँ छ भन्ने प्रश्न अझै अनुत्तरित छ । ममताकी तीन वर्षीया छोरीको हेरचाह अहिले उनका परिवारले गरिरहेका छन् । नरेशको सजाय निर्धारणसँगै यो प्रकरणले अर्को कानुनी चरणमा प्रवेश गर्नेछ । अन्तर्राष्ट्रिय न्यूज एजेन्सीहरूकाे सहयाेगमा तयार पारिएकाे
दया दुदराज कान्तिपुर मिडिया ग्रुपमा आबद्ध मिडिया रिपोर्टर हुन् । उनी मिडिया र सूचना प्रविधिबारे रिपोर्टिङ गर्छन् ।
.png)
