पूर्वाधार विकासमन्त्री सुलिन लम्सालले आयोजनालाई उच्च प्राथमिकता दिँदै खेल पूर्वाधार, पर्यटन र सुदूरपश्चिमको आर्थिक विकासमा योगदान पुर्याउने बताएका छन्।
काठमाडौँ — कैलालीको धनगढीस्थित फाप्ला अन्तर्राष्ट्रिय क्रिकेट रङ्गशाला निर्माणका लागि सरकारले ठेक्का आह्वान गरी प्रक्रिया अघि बढाएको छ ।
पूर्वाधार विकास मन्त्रालयले हालको जमिनको सतहमा माटो भर्ने तथा जमिन सम्याउने, प्यारापिटको अगाडिको भागमा ब्लक निर्माण गर्नेलगायतका कामका लागि ठेक्का आह्वान गरेको हो ।
पूर्वाधार विकासमन्त्री सुलिन लम्सालले खेल पूर्वाधार विकासलाई उच्च महत्त्व दिएको बताएका छन् । ‘सुदूरपश्चिमवासीको सपना र राष्ट्रिय महत्त्व बोकेको यस आयोजनालाई उच्च प्राथमिकताका साथ अघि बढाउँदै खेल पूर्वाधार विकास, पर्यटन प्रवर्द्धन तथा समग्र आर्थिक विकासमा महत्त्वपूर्ण योगदान पुर्याउने लक्ष्य राखेका छौं,’ उनले फेसबुकमा लेखेका छन् ।
२०६६ सालदेखि अन्तर्राष्ट्रिय क्रिकेट रङ्गशाला निर्माणको कुरा उठेको हो ।२०७२ सालदेखि फाप्लालाई अन्तर्राष्ट्रिय क्रिकेट रङ्गशालाका रूपमा विकास गर्न ‘ड्रिम फाप्ला’ अभियान अघि बढाइएको थियो ।
यसअघिको समाचारमा ठेक्का आह्वान भएको रकममा अन्यथा भएकाले सच्याइएको छ। –सम्पादक