आईसीसी यू–१९ महिला टी–२० विश्वकप तयारीका लागि नेपाली टोलीले नोभेम्बर ३ देखि चीनमा हुने प्रतियोगिता खेलेपछि भारतमा त्रिकोणात्मक सिरिजमा प्रतिस्पर्धा गर्नेछ ।
काठमाडौँ — आईसीसी यू–१९ महिला टी–२० विश्वकपको तयारीका लागि नेपाली टोलीले चीन र भारतमा दुई सिरिज खेल्ने भएको छ। नेपाल क्रिकेट संघ (क्यान) का अनुसार टोलीले नोभेम्बर ३ देखि चीनमा हुने प्रतियोगिता खेलेपछि भारतमा त्रिकोणात्मक सिरिजमा प्रतिस्पर्धा गर्नेछ।
टोलीले चीनमा नोभेम्बर ३ देखि ८ सम्म बेल्ट एन्ड रोड यू–१९ गर्ल्स टी–२०आई’ प्रतियोगिता खेल्नेछ । प्रतियोगितामा नेपालसहित चीन, हङकङ र थाइल्यान्डले प्रतिस्पर्धा गर्नेछन् ।
नेपालले नोभेम्बर ३ मा थाइल्यान्ड तथा त्यसपछि हरेक दिन चीन र हङकङसँग प्रतिस्पर्धा गर्नेछ । डबल राउण्ड रोबिनमा पुन: थाइल्यान्ड चीन र हङकङसँग खेल्नेछ ।
त्यसपछि नेपाली टोली भारत जानेछ । भारतको बैंगलुरुमा नोभेम्बर १० देखि २२ सम्म आयोजना हुने त्रिकोणात्म सिरिजमा भारत यू–१९ महिला ‘ए’ र भारत यू–१९ महिला ‘बी’ टोलीको सानमा गर्नेछ । पहिलो खेलमा नोभेम्बर १२ मा भारत बीको सामना गर्ने छ भने त्यसको २ दिन पछि महिला ‘ए’ सँग खेल्ने छ । तेस्रो खेलमा १८ नोभेम्बरमा महिला बी र २० मा महिला ‘ए’ सँग प्रतिस्पर्धा गर्ने छ । फाइनल खेल २२ नोभेम्बरमा हुनेछ ।
आईसीसी यू–१९ महिला टी–२० विश्वकप आगामी जनवरी २१ देखि ६ फेब्रुअरीसम्म नेपाल र बंगलादेशमा आयोजना हुँदै छ । १६ टोली सहभागी रहने प्रतियोगिताको समूह एमा नेपालसहित भारत, आयरल्यान्ड र वेस्ट इन्डिज रहेका छन् ।
