नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले आफू ७३ वर्ष प्रवेश गर्न लागे पनि वैचारिक रूपमा नयाँ विद्रोहको तयारीमा रहेको बताएका छन्। उनले संविधानलाई परिमार्जन र परिष्कृत गर्दै जनताको अधिकारलाई थप उचाइमा पुर्याउने उद्देश्यसहित फेरि अर्को आन्दोलन आवश्यक रहेको बताएका हुन्।
एक सार्वजनिक कार्यक्रममा बोल्दै प्रचण्डले भौतिक उमेर र वैचारिक ऊर्जालाई अलग रूपमा व्याख्या गरे। “भौतिक उमेरको हिसाबले म ७२ कटेर अब ७३ टेक्दै छु, तर विचारको हिसाबले म अर्को एउटा विद्रोहको तयारीमा छु,” उनले भने।
उनका अनुसार आगामी आन्दोलनको उद्देश्य जनतालाई मुक्त गर्ने, संविधानमा आवश्यक सुधार गर्ने र नागरिकका अधिकारलाई थप सुदृढ बनाउने हुनेछ। उनले यसलाई विगतको जनयुद्धको निरन्तरताभन्दा पनि अहिलेको राजनीतिक र संवैधानिक अवस्थालाई नयाँ उचाइमा पुर्याउने अभियानका रूपमा प्रस्तुत गरे।
प्रचण्डले संविधान सभा, संघीय लोकतान्त्रिक गणतन्त्र तथा दलित, महिला, आदिवासी जनजाति, मधेसी, थारु र मुस्लिम समुदायको पहिचान तथा प्रतिनिधित्वलाई जनयुद्धबाट प्राप्त उपलब्धिका रूपमा व्याख्या गरे। तर, यी उपलब्धिलाई अझै परिष्कृत गर्दै जनताको अधिकार विस्तार गर्नुपर्ने उनको भनाइ थियो।
उनले नेता तथा कार्यकर्तालाई निराशा त्यागेर मार्क्सवादी आशावादका साथ अघि बढ्न आग्रह गरे। राष्ट्रिय जागरण अभियानमा जोडिन र नयाँ परिवर्तनको सपना कायम राख्न आम नागरिकलाई समेत अपिल गर्दै प्रचण्डले आफू वैचारिक रूपमा अर्को आन्दोलनका लागि तयार रहेको सन्देश दिएका छन्।
