दोधारा चाँदनीका प्रेम रोकायाले चार वर्षदेखि गर्दै आएको फूल खेतीबाट यस वर्ष १० क्विन्टल हाराहारी उत्पादन गरेका छन् । उनले महेन्द्रनगर बजारमा प्रतिकिलो ३५० देखि ४०० रुपैयाँसम्ममा सयपत्री बिक्री गरिरहेका छन् ।
कञ्चनपुर — कञ्चनपुरको दोधारा चाँदनी नगरपालिका–८ सुन्दरनगरका प्रेम रोकाया मंगलबार बिहानैदेखि महेन्द्रनगर बजारमा सयपत्री फूल बिक्री गर्दै हिँडेका छन् । विद्युतीय अटोमा फूल बोकेर उनी बजारका गल्लीसँगै आवासीय क्षेत्रमा समेत पुगिरहेका थिए ।
‘फूल आयो, माला आयो, ताजा ताजा फूल आयो’ यही भाकामा उनी ग्राहकलाई लोभ्याइरहेका थिए । उनले एकै दिन ६ क्विन्टलसम्म फूल बिक्री गरेको बताए ।
‘घरमा बारीबाटै पनि बिक्री भइरहेको छ,’ रोकायाले भने, ‘दोधारा चाँदनी र महेन्द्रनगरमा पनि बिहानैदेखि बिक्री भइरहेको छ ।’ उनले थोकमा साढे ३ सय प्रतिकिलो र फुटकरमा ४ सय रुपैयाँमा बिक्री गरिरहेका छन् । यसैगरी माला ८० देखि १ सय रुपैयाँसम्ममा बिक्री भइरहेको बताए ।
‘भाइटीकाको दिन पनि बिहान बिक्री हुन्छ,’ उनले भने, ‘त्यसपछि अन्य कार्यक्रम र विवाह आदिका लागि पनि फूल तयार भइरहेका छन् ।’ उनले दसैंका बेला पनि दुई/तीन क्विन्टल फूल बिक्री गरेका थिए ।
एक दशक अघिसम्म उनी भारतमा काम गर्थे । घर फर्केर तरकारी खेती सुरु गरेका उनले अहिले फूल खेती पनि थालेका छन् । उनले ४ वर्षदेखि निरन्तर फूल खेती गरिरहेका छन् । यस पटक १२ कट्ठामा फूल रोपेका छन् । त्यसमा १० क्विन्टल हाराहारी फूल उत्पादन भएको उनले बताए ।
भवानी भट्ट कान्तिपुरका कञ्चनपुर संवाददाता हुन् ।
