नेपाल संवत् ११४७ को अवसरमा नेवाः देय् दबू पाँचथरले फिदिममा प्रभातफेरी र शुभकामना आदानप्रदान कार्यक्रम आयोजना गरेको हो ।
पाँचथर — पाँचथरमा नेपाल संवत् ११४७ को स्वागत गरिएको छ ।
नेवाः देय् दबू जिल्ला समिति पाँचथरले मंगलबार फिदिममा शुभकामना आदानप्रदान र प्रभातफेरी कार्यक्रम आयोजना गर्दै नेपाल संवत्को स्वागत गरेको हो ।
कार्यक्रमअघि नेवाः समुदायको सांस्कृतिक पहिचान झल्काउने झाँकी र लाखे नाचसहित फिदिम बजार परिक्रमा गरिएको थियो । बजार परिक्रमा गरी पाँचथर उद्योग वाणिज्य संघको सभाहलमा पुगेको टोलीले त्यहाँ शुभकामना आदानप्रदान कार्यक्रम गरेको थियो ।
शुभकामना आदानप्रदान कार्यक्रममा सहभागी वक्ताहरूले नेपाल संवत्को नयाँ वर्षले आपसी सद्भाव, एकता र सांस्कृतिक पहिचानको संरक्षणमा योगदान पुर्याउने विश्वास व्यक्त गर्दै नयाँ वर्षको शुभकामना साटासाट गरे ।
नेवाः देय् दबू जिल्ला समिति पाँचथरका अध्यक्ष रमेश भगवत प्रधानाङको अध्यक्षतामा भएको कार्यक्रमको सञ्चालन सचिव सन्तोष श्रेष्ठले गरेका थिए ।
लक्ष्मी गौतम कान्तिपुरका पाँचथर संवाददाता हुन् ।
