सिड्नी, तास्मानिया र एडिलेडमा नोभेम्बर ७, १४ र २८ मा तथा अन्य सहरमा अर्को वर्ष महोत्सव हुँदैछ।
अस्ट्रेलिया — अस्ट्रेलियाका सबै सहरमा नेपाल महोत्सवको तयारी सुरु गरिएको छ । अस्ट्रेलियामा नेपाली कलासंस्कृति तथा पर्यटन प्रवर्द्धन गर्ने उद्देश्यका साथ करिब दुई दशकदेखि नेपाल महोत्सवको आयोजना हुँदै आएको छ ।
अस्ट्रेलियास्थित प्रवासी नेपालीको संगठन एनआरएनए अस्ट्रेलियाले हरेक दुई वर्षमा नेपाल महोत्सवको आयोजना गर्दै आएको छ । संस्थाले जनाएअनुसार एडिलेड, सिड्नी र तास्मानियामा यही नोभेम्बरमा महोत्सव आयोजना हुँदैछ भने ब्रिसबेन, मेलबर्न र क्यानबेरामा अर्को वर्षको सुरुवातमा आयोजना हुने भएको छ ।
एनआरएनए अस्ट्रेलियाका अनुसार यस वर्षको नेपाल महोत्सव सिड्नीमा यही नोभेम्बर ७ तारिख, तास्मानियामा १४ तारिख र एडिलेडमा २८ तारिखमा आयोजना हुनेछ । यसैगरी क्यानबेरामा आगामी वर्षको फेब्रुअरी, मेलबर्नमा मार्च र ब्रिसबेनमा अप्रिल महिनामा आयोजना हुँदैछ । डार्बिन र पश्चिम अस्ट्रेलियामा महोत्सव सम्पन्न भइसकेको छ ।
अस्ट्रेलियाका ६ राज्य तथा दुई टेरिटोरीका मुख्य सहरको पर्यटकीय क्षेत्रमा नेपाल महोत्सव आयोजना हुने गरेको छ । महोत्सवको माध्यमबाट नेपाली कलासंस्कृति, परम्परा, गीतसंगीत र पर्यटनको प्रवर्द्धन गर्ने मुख्य उद्देश्य राखिएको छ । नेपालको मौलिक पहिचान, संस्कृति र पर्यटनलाई झल्काउन हरेक राज्यमा हुने महोत्सवमा नेपाल हाउसको आयोजना गरिएको छ । यसैगरी नेपाली परम्परागत पोसाकसहित नेपाल परेडको समेत आयोजना हुँदैछ । महोत्सवमा नेपालीका साथै अस्ट्रेलियामा रहेका अन्य समुदायका प्रतिनिधिको उल्लेख्य सहभागिता रहने गरेको छ । यसैगरी अस्ट्रेलियाली मन्त्री, सांसद तथा राजनीतिक दलका प्रतिनिधिको पनि उल्लेख्य सहभागिता रहने आयोजक एनआरएनएले जनाएको छ ।
यस वर्षको नेपाल महोत्सवमा राज्यका प्रिमियर तथा गभर्नरले समेत सहभागिता जनाउने भएका छन् । तास्मानियाको होबार्टमा हुने महोत्सवमा राज्यका गभर्नरले पहिलोपटक सहभागिता जनाउने तय भएको आयोजकले बताएको छ । दक्षिण अस्ट्रेलियाको एडिलेडमा यही २८ तारिखमा हुने महोत्सवको जानकारी दिन आयोजना गरिएको कार्यक्रममा एनआरएनएका राज्य संयोजक थिर गुरुङले पहिलोपटक राज्यका प्रिमियर पिटर मालिनास्कसले सहभागिता जनाउने जानकारी दिए ।
उनले महोत्सवको तयारी अन्तिम चरणमा पुगेको जानकारी दिँदै महोत्सवलाई सफल बनाउन २० अलग उपसमिति बनाएर काम गरिरहेको सुनाए । उनले महोत्सवका लागि राज्य सरकारले ३० हजार अस्ट्रेलियन डलर सहयोग गरेको बताउँदै कार्यक्रम सम्पन्न गर्न करिब २ लाख डलर खर्च हुनेसमेत बताए ।
नेपाली समुदायको उपस्थिति बढिरहेसँगै नेपाली चाडपर्व तथा सार्वजनिक कार्यक्रममा यहाँका उच्चस्तरीय राजनीतिज्ञको सहभागिता बढ्दै गएको छ । राज्य सरकारले सामाजिक कार्यक्रममा आर्थिक सहयोगसमेत पुर्याउँदै आएको छ । यस वर्ष सिड्नीको पर्यटकीय क्षेत्र डार्लिङ हार्बरमा हुने नेपाल महोत्सवमा अस्ट्रेलियाली प्रधानमन्त्री एन्थोनी अल्बानिजीले सहभागिता जनाउने बताइए पनि अहिलेसम्म यसबारेमा कुनै औपचारिक निर्णय भइनसकेको आयोजकले जनाएको छ ।
नेपाल महोत्सव नेपाली कलासंस्कृति र पर्यटन प्रवर्द्धन गर्ने थलो मात्र नभएर यहाँ ठूलो संख्यामा हुर्कंदै गरेको दोस्रो पुस्ताका नेपालीलाई नेपालसँग जोड्ने अवसरसमेत भएको एनआरएनए ओसिनिया संयोजक रमेश जोशीको भनाइ छ । उनले नेपाल महोत्सवले नेपाल र नेपालीलाई समग्र अस्ट्रेलियामा थप चिनाउने मात्र नभएर यहाँको परिवेशमा हुर्कंदै गरेको दोस्रो पुस्तालाई नेपालको कलासंस्कृति, भाषा र परम्परासँग नजिक ल्याउने कार्यमा महत्त्वपूर्ण भूमिका खेलिरहेको सुनाए ।
नारायण खड्का अस्ट्रेलियाका कान्तिपुर प्रतिनिधि हुन् । उनले प्रवासी नेपाली समाज, राजनीति र समसामयिक विषयमा रिपोर्टिङ गर्छन् ।
