नेपाल भ्रमणमा रहेका चिनियाँ नागरिक युहास लिउ र नेपाली गाइड दिनेश पुरीलाई बिहीबार बिहान करिब ५ बजेतिर भारतीय सुरक्षाकर्मीहरूले पक्राउ गरेका हुन् ।
विराटनगर — नेपाल–भारत सीमा क्षेत्र हुँदै कञ्चनजङ्घा हिमालको दृश्यावलोकनमा गर्न जाने क्रममा भारतीय सशस्त्र सीमा बल (एसएसबी)का प्रतिनिधिले एक चिनियाँ पर्यटक र नेपाली गाइडलाई पक्राउ गरेको छ ।
नेपाल भ्रमणमा रहेका चिनियाँ नागरिक युहास लिउ (३१) र नेपाली गाइड दिनेश पुरीलाई बिहीबार बिहान करिब ५ बजेतिर पाँचथरको फालेलुङ गाउँपालिका–४, चाररातेस्थित फालेलुङ कम्युनिटी होमस्टेबाट निस्किएपछि भारतीय सुरक्षाकर्मीले पक्राउ गरेको हो ।
फालेलुङ कम्युनिटी होमस्टेका अनुसार पर्यटक लिउ र गाइड पुरी कञ्चनजङ्घा हिमालको बिहानीको दृश्यावलोकन गर्न तथा नेपाल–भारत सीमा क्षेत्र घुम्न जाने क्रममा भारतीय भूमितर्फ प्रवेश गरेपछि एसएसबीले उनीहरूको पासपोर्ट जाँच गरेको थियो । चिनियाँ नागरिकको पासपोर्टमा भारतीय भिसा नभेटिएपछि दुवैलाई नियन्त्रणमा जनाइएको छ ।
गाइड पुरी लिउको झोला र अन्य सामान लिएर होमस्टेबाट निस्किएका थिए । फालेलुङ कम्युनिटी होमस्टेका सञ्चालक डिल्ली केरुङले घटनाबारे पर्यटक प्रहरी शाखा, काँकडभिट्टालाई टेलिफोनमार्फत जानकारी गराएका छन् ।
पाँचथरका प्रहरी प्रमुख डिएसपी अनिश कुमार कर्णले घटनाबारे भारतीय सुरक्षा निकायको थप विवरण र पक्राउ परेका दुवै जनाको पछिल्लो अवस्थाबारे भने स्पष्ट हुन बाँकी रहेको बताए ।
पर्वत पोर्तेल कान्तिपुर मिडिया ग्रुपका कोशी प्रदेश संवाददाता हुन् । उनी झापा र विराटनगर क्षेत्रबाट लेख्छन् ।
