कविडाँडा साहित्य समाजले दिएको उक्त पुरस्कारको राशि २ लाख १६० रुपैयाँ रहेको छ ।
चितवन — नीलम कार्की निहारिकाको उपन्यास ‘राजमाता’ले प्राप्त गरेको २०८२ को ‘कविडाँडा आख्यान पुरस्कार’ शुक्रबार वितरण भएको छ ।
कविडाँडा साहित्य समाजले दिएको उक्त पुरस्कारको राशि २ लाख १६० रुपैयाँ रहेको छ । आख्यान अर्थात् कथा र उपन्यास कृतिका लागि दिइने यो राशिको पुरस्कार नेपालमै सर्वाधिक रहेको कविडाँडा साहित्य समाजका अध्यक्ष एलबी क्षेत्रीको दाबी छ ।
कविडाँडा साहित्य समाजले वर्षभरि प्रकाशन भएका आख्यान कृतिमध्ये उत्कृष्ट छनोट गरेर एउटालाई पुरस्कृत गर्दै आएको अध्यक्ष क्षेत्रीले जानकारी दिए । चितवनको भरतपुरमा २०६० सालमा स्थापना भएको कविडाँडा साहित्य समाजले २०७५ सालदेखि हरेक वर्ष आख्यान पुरस्कार दिँदै आएको छ । गत वर्ष प्रकाशित उत्कृष्ट आख्यानमध्ये ‘राजमाता’लाई पुरस्कृत गर्ने घोषणा असोज ७ गते गरिएको थियो ।
‘हामीले आख्यानका २५/३० कृति प्राप्त गरेका थियौं । तीमध्ये पुरस्कारका लागि छनोटमा परेका १६ कृतिको पहिलो सूची सार्वजनिक गर्यौं । अनि आठ हुँदै उत्कृष्ट तीन कृतिको नाम आयो । जसमध्ये राजमातालाई २०८२ सालमा प्रकाशित उत्कृष्ट आख्यान घोषित गर्यौं,’ अध्यक्ष क्षेत्रीले भने । समाजले गठन गरेको निर्णायक समितिले अन्य साहित्य पारखीको परामर्शमा यो घोषणा गरेको उनले बताए ।
अध्यक्ष क्षेत्रीले देश समृद्ध हुन साहित्य समृद्ध हुनुपर्ने र समृद्ध साहित्य लेखनलाई प्रोत्साहित गर्न पुरस्कार स्थापना गरेको बताए ।
‘राजमाता’मा राज्य सञ्चालनमा नारीहरू र राजमाताहरूले खेलेको भूमिकालाई ऐतिहासिक तथ्यमा आधारित रहेर कलात्मक तरिकाले प्रस्तुत गरेको क्षेत्रीको भनाइ थियो । उपन्यासमा मातृसत्ताको सन्दर्भमा साहसिक कल्पना रहेको उनले बताए ।
रमेशकुमार पौडेल कान्तिपुरका चितवन संवाददाता हुन् । उनी दुई दशकदेखि पत्रकारिता गरिरहेका छन् ।
