चितवनको जितसँगै प्लेअफ सम्भावना कायम रहेकोमा कप्तान सिकन्दर राजाले खुसी व्यक्त गरेका छन् । जनकपुरमाथिको जितमा डाविड मालनको प्रदर्शन निर्णायक रहेको उनको भनाइ छ ।
काठमाडौँ — चितवनका कप्तान सिकन्दर राजाले नेपाल प्रिमियर लिग (एनपीएल) को तेस्रो सिजनमा आफ्नो टिमको प्लेअफ सम्भावना कायम रहेको खुसी व्यक्त गरे । उनले आफ्नो टिमले जनकपुर बोल्ट्समाथि प्राप्त जित संघर्षपूर्ण रहेको पनि स्विकारे ।
उनले आफ्नो टिमको जितमा डाविड मालनको महत्त्वपूर्ण भूमिका रहेको बताए । उनले भने, ‘मालनले आज निर्णायक प्रदर्शन गरे । उनी निकै अनुभवी ब्याटर हुन् । उनले आजको जस्तो खेलमा कसरी खेल्नु पर्छ भनेर राम्रोसँग थाहा छ ।’
जितका लागि ८९ रनको लक्ष्य पाएको चितवनले १७.२ ओभरमा छ विकेट गुमाएर ९२ रन बनाएको हो । यसअघि पहिले ब्याटिङ गरेको जनकपुरले नौ विकेट गुमाएर ८८ रन बनाएको थियो । खेलको ‘प्लेयर अफ द म्याच’ मालन नै रहे ।
उनले ३५ रन बनाए र नटआउट पनि रहे । मालनले भने, ‘पिचबारे धेरै ध्यान दिएर खेलेनौं र साझेदारी बनाउने प्रयास गर्यौं । मलाई लाग्छ, ब्याटिङका क्रममा दबाबमा आएनौं । जितमा जहिल्यै पनि खुसी हुन्छ नै । आजको जित केही विशेष रह्यो ।’
यो जितपछि चितवनको सात अंक भएको छ, चौथो स्थानमा उक्लेको छ । यही जितले उसको प्लेअफ खेल्ने सम्भावना जीवन्त रहेको हो । यो नतिजापछि पहिलो सिजनको विजेता जनकपुरसँगै कर्णाली याक्सको पनि प्लेअफ सम्भावना समाप्त भएको छ ।
पोखरा एजेन्जर्सको यसअघि नै लिग चरण काट्ने सम्भावना सकिसकेको छ । हारपछि जनकपुरका कप्तान हरमित सिंहले निराशा पोखे । उनले भने, ‘पिच केही सुस्त रह्यो । यसमा खेल्न निकै कठिन रह्यो । अहिलेको हाम्रो टिम निकै युवा छ, अबको दिनमा यसले राम्रो गर्नेछ ।’
