चितवनले ६ खेलमा ७ अंक पुर्याएको छ । प्ले अफमा स्थान निश्चित नै गर्न टोलीले अन्तिम खेलमा कर्णाली याक्सलाई पराजित गर्नु पर्नेछ । चितवनको यस विजयले जनकपुर र कर्णाली आधिकारिक रुपमै प्ले अफ दौडबाट बाहिरिएका छन् ।
काठमाडौँ — चितवन राइनोजले नेपाल प्रिमियर लिग (एनपीएल) क्रिकेटको प्ले अफमा पुग्ने आशालाई जीवितै राखेको छ । चितवनले शुक्रबारको दोस्रो खेलमा जनकपुर बोल्ट्सलाई ४ विकेटले पराजित गर्यो ।
टस जितेर ब्याटिङ रोजेको पहिलो सिजनको च्याम्पियन जनकपुरले निर्धारित २० ओभरमा ९ विकेट गुमाई ८८ रन मात्र बनाउन सकेको थियो । ब्याटिङका लागि कठिन पिचमा चितवनले १७.२ ओभरमा लक्ष्य पुरा गरेको थियो ।
चितवनले ६ खेलमा ७ अंक पुर्याएको छ । प्ले अफमा स्थान निश्चित नै गर्न टोलीले अन्तिम खेलमा कर्णाली याक्सलाई पराजित गर्नु पर्नेछ । चितवनको यस विजयले जनकपुर र कर्णाली आधिकारिक रुपमै प्ले अफ दौडबाट बाहिरिएका छन् ।
पहिलो ओभरमै ललित राजवंशीले अर्जून साउदलाई शून्यमा बोल्ड गरी जनकपुरलाई आशा देखाएका थिए । युवा तीब्र बलर राहुल यादवले कामिल मिसरालाई १२ र रबि बोपारालाई १३ रनमा बोल्ड गरे । ललितले कप्तान सिकन्दर राजालाई शून्यमा एलबीडब्लु आउट गरे । राहुलले विवेक यादवलाई ७ रनमा विकेटको पछाडि क्याच आउट गराएपछि चितवन छैटौं ओभरमा ३७–५ को स्थितिमा पुगेको थियो ।
डेविड मलानले पूर्व कप्तान कुशल मल्लसँग मिलेर चितवनलाई विजयको नजिक पुर्याए । कुशलले २५ बल खेली १ चौकासहित १५ रन बनाए । डिसिजन रिभ्यु सिस्टममा कट एन्ड बिहाइन्ड भएपछि कुशल आक्रोसित बन्दै क्रिज छाडेका थिए । मलानले संयमीत ब्याटिङ गर्दै चितवनलाई विजयी बनाए । उनले ललितको बलमा विजयी रन छक्का प्रहार गर्दै बटुले । मलानले ३९ बलको इनिङ्समा ३६ रन बनाउनेक्रममा अन्य बाउन्ड्री भने प्रहार गरेका थिएनन् । कमलसिंह ऐरी १० बल खेली ७ रनमा अविजित रहे ।
यसअघि प्लेअफ पुग्ने झिनो आशालाई जिवितै राख्न जित्नै पर्ने खेलमा जनकपुरले फितलो ब्याटिङ गरेको थियो । तृतराज दास ९ बल खेली ५ रन बनाई रन्जीत कुमारको आउट भए । चितवनका कप्तान सिकन्दरले आफ्नै देश जिम्बावेका ब्याटर रायन बर्ललाई ६ रनमा बोल्ड गरी दोस्रो सफलता दिलाए । देव्रेहाते स्पिनर रन्जीतले ओपनर सन्तोष कार्की र हयारी ट्रक्टरलाई आउट गरेपछि चितवनले खेल पूर्णरुपमा नियन्त्रणमा लियो ।
प्रतियोगितामा पहिलो खेल खेलिरहेका सन्तोषले १ छक्कासहित ११ बलमा १० रन बनाए भने ट्रक्टरले खाता खोल्न पनि भ्याएनन् । विशाल सुस्लिङले १३ बल खेली समान १ चौका र छक्कासहित १५ रन बनाए । तर जिम्मी निसम शून्य र अभिषेक तिवारी ४ रनमा आउट भएपछि जनकपुर ६२–७ को स्थितिमा पुगेको थियो । आदित्य महता २६ बल खेली ४ रनमा आउट भएका थिए ।
कप्तान हरमित सिंहले सर्वाधिक २५ रन बनाए । २५ बल खेली २ चौका र १ छक्का प्रहार गरी उनी अन्तिम ओभरमा आउट भए । इनिङ्सको अनितम बलमा छक्का प्रहार गरेका राहुल १० बल खेली १० र ललित २ रन बनाई अविजित रहे । चितवनका रन्जीत कुमारले ३ ओभरमा १ मेडन राख्दै २ रनमात्र खर्चेर ३ विकेट लिए । सिकन्दरले ४ ओभरमा २ मेडन राख्दै १० र कामिलले ३ ओभरमा १८ रन खर्चेर २–२ विकेट लिए । कमल र रिजन ढकालको नाममा १–१ विकेट रहयो ।
विनोद पाण्डे कान्तिपुरका खेलकुद ब्यूरो प्रमुख हुन् ।
