काठमाडौं। सर्वोत्तम सिमेन्ट लिमिटेडले आफ्नो आठौँ वार्षिक साधारणसभा आह्वान गरेको छ। कम्पनीको कात्तिक २९ गते बसेको सञ्चालक समितिको २४३औँ बैठकले आगामी पुस २ गते साधारणसभा आयोजना गर्ने निर्णय गरेको हो।
सभामा कम्पनीले गत आर्थिक वर्ष २०८२/८३ को मुनाफाबाट सेयरधनीलाई १५ प्रतिशत नगद लाभांश र ६ प्रतिशत बोनस सेयर वितरण गर्ने प्रस्ताव पारित गर्नेछ।
कम्पनीले हाल कायम चुक्तापुँजी ५ अर्ब २२ करोड ४२ लाख ७५ हजार रुपैयाँको १५ प्रतिशतका दरले हुन आउने ७८ करोड ३६ लाख ४१ हजार २५० रुपैयाँ नगद लाभांश वितरण गर्ने प्रस्ताव गरेको छ। उक्त नगद लाभांशमा लाभांश करसमेत समावेश गरिएको छ।
त्यस्तै, कम्पनीले चुक्तापुँजीको ६ प्रतिशतका दरले हुन आउने ३१ करोड ३४ लाख ५६ हजार ५०० रुपैयाँबराबरको बोनस सेयर वितरण गर्ने प्रस्ताव पनि सभामा पेस गर्नेछ।
प्रस्तावित बोनस सेयर वितरणपछि कम्पनीको चुक्तापुँजी वृद्धि हुने भएकाले सोहीअनुसार प्रबन्धपत्रमा आवश्यक संशोधन गर्ने विशेष प्रस्तावसमेत सभाबाट पारित गरिनेछ।
सभामा कम्पनीको अधिकृत पुँजी वृद्धि गरी ६ अर्ब रुपैयाँ कायम गर्ने विशेष प्रस्ताव पनि पेस हुनेछ।
साधारणसभा प्रयोजनका लागि कम्पनीले मंसिर १८ गते शुक्रबार एक दिन सेयरधनी दर्ता किताब बन्द (बुक क्लोज) गर्ने निर्णय गरेको छ।
अहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।