निर्वाचनको तयारीमा आयोग सक्रिय : मंसिर ४ गते राजनीतिक दलहरूसँग निर्णायक छलफल हुने

काठमाण्डौ । आगामी निर्वाचनको तयारीलाई तीव्रता दिँदै निर्वाचन आयोगले राष्ट्रिय मान्यता प्राप्त राजनीतिक दलहरूलाई छलफलका लागि बोलाएको छ।

आयोगले आगामी मंसिर ४ गते निर्वाचनको तयारी तथा व्यवस्थापनका विषयमा छलफल गर्न राजनीतिक दलहरूलाई पत्राचार गरेको हो।

निर्वाचन आयोगका आयुक्त गुरुप्रसाद वाग्लेले राष्ट्रिय मान्यता प्राप्त राजनीतिक दलहरूलाई छलफलका लागि औपचारिक पत्र पठाइएको पुष्टि गरेका छन्।

सरकारले आगामी फागुन महिनामा स्थानीय तहको निर्वाचन गर्ने तयारी गरिरहेका बेला आयोगले राजनीतिक दलहरूसँग परामर्श अघि बढाएको हो।

पछिल्लो समय स्थानीय तह र प्रदेश तहको निर्वाचन एकै चरणमा गर्ने वा अलग-अलग मितिमा सम्पन्न गर्ने भन्ने विषयमा समेत बहस भइरहेको छ। यही सन्दर्भमा आयोगले बोलाएको बैठकलाई महत्त्वपूर्ण रूपमा हेरिएको छ।

नेपाली कांग्रेसका सभापति गगन थापाले पनि आयोगले मंसिर ४ गते राजनीतिक दलहरूलाई निर्वाचनसम्बन्धी छलफलका लागि बोलाएको जानकारी दिएका छन्।

आइतबार छठ पर्वका अवसरमा सर्लाही पुगेका थापाले सञ्चारकर्मीहरूसँग कुरा गर्दै स्थानीय तथा प्रदेश तहको निर्वाचनका विषयमा छलफल गर्न आयोगबाट निमन्त्रणा आएको बताएका हुन्।

आगामी निर्वाचनको समयतालिका, व्यवस्थापकीय तयारी तथा निर्वाचन सञ्चालनका विषयमा राजनीतिक दलहरूसँग छलफल हुने अपेक्षा गरिएको छ।

यद्यपि स्थानीय र प्रदेश तहको निर्वाचन एकै चरणमा गर्ने वा छुट्टाछुट्टै सञ्चालन गर्ने भन्ने विषयमा अन्तिम निर्णय भइसकेको छैन।

अहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।