पूर्वाधार विकासमन्त्री सुनिल लम्सालले जनकपुरधामको विकासका लागि पर्याप्त बजेट विनियोजन गरिएको भन्दै सुन्दर र व्यवस्थित बनाउने योजनालाई प्राथमिकता दिइएको बताए ।
काठमाडौँ — पूर्वाधार विकासमन्त्री सुनिल लम्सालले जनकपुरधामलाई सुन्दर र व्यवस्थित सहरका रूपमा विकास गर्न अभियान सुरु भइसकेको बताएका छन् ।
जनकपुरधाममा आयोजित कार्यक्रममा उनले जानकी मातासँग सम्बन्धित सबै संरचनाको पुनर्निर्माण र व्यवस्थापन गरिने बताए । यसका लागि बजेटमा कुनै कन्जुस्याइँ नगरिएको उनको भनाइ थियो । 'जनकपुरधामको विकासका लागि पर्याप्त बजेट विनियोजन गरिएको छ,' उनले भने, 'चालु आर्थिक वर्षको बजेटमा जनकपुरधामको सहरलाई सुन्दर र व्यवस्थित बनाउने योजनालाई प्राथमिकता दिइएको छ ।'
आगामी चैत–वैशाखसम्म जनकपुरधाममा उल्लेखनीय परिवर्तन देखिने उनले दाबी गरे । विवाहपञ्चमी महोत्सवलाई प्रवर्धन गर्न र उत्सवको रौनक बढाउन बजेट छुट्याउने विषयमा पनि छलफल भइरहेको उनले जानकारी दिए ।पर्यटन बोर्डमार्फत आवश्यक बजेट व्यवस्थापन गर्न सकिने उल्लेख गर्दै उनले सम्बन्धित निकायलाई आवश्यक योजना र लागत विवरणसहित प्रश्ताव तयार पार्न आग्रह गरे ।