तीन महिनामा वैदेशिक रोजगारीमा जानेको संख्या भने १.७५ प्रतिशतले बढेको छ ।
काठमाडौँ — चालु आर्थिक वर्ष २०८३-८४ को तीन महिना (साउनदेखि असोज) सम्ममा कुल सात खर्ब ३ अर्ब रुपैयाँ रेमिट्यान्स भित्रिएको छ ।
गत आर्थिक वर्ष २०८२-८३ को यही अवधिमा ५ खर्ब ५३ अर्ब रेमिट्यान्स भित्रिएको थियो । २७ प्रतिशतले धेरै रेमिट्यान्स भित्रिएको हो ।
असोज महिनामा मात्रै करिब दुई खर्ब ६७ अर्ब रुपैयाँ बराबर रेमिटेन्स भित्रिएको हो ।
करिब ३९ महिनादेखि निरन्तर रूपमा मासिक एक खर्ब रुपैयाँभन्दा बढी रेमिट्यान्स भित्रिरहेको छ । पछिल्लो सात महिनादेखि निरन्तर मासिक दुई खर्ब रुपैयाँ रेमिट्यान्स भित्रिरहेको छ ।
दसैं तिहारजस्ता चाडपर्व नजिकिँदा समेत तुलनात्मक रूपमा अन्य महिनामा भन्दा रेमिट्यान्स भित्रिने दर बढ्ने गर्छ ।
यो अवधिमा २ अर्ब ६९ करोड रुपैयाँ रेमिट्यान्स बाहिरिएको छ । गत वर्षको यही अवधिमा ३ अर्ब ७६ करोड रूपैयाँ बाहिरिएको थियो ।
तीन महिनामा वैदेशिक रोजगारीमा जानेको संख्या १.७५ प्रतिशतले बढेको छ । यसअघि दुई लाख सात सय १६ जनाले नयाँ र पुनः श्रम स्वीकृति लिएकोमा यस वर्ष यो अवधिमा दुई लाख ४ हजारले यस्तो स्वीकृति लिएका छन् ।
रेमिट्यान्स बढेसँगै मुलुकको विदेशी मुद्राको सञ्चितिमा रेकर्ड बन्ने क्रमले निरन्तरता पाइरहेकै छ । विदेशी मुद्राको सञ्चिति ४१ खर्ब ६१ अर्ब रुपैयाँ पुगेको छ ।
हालको सञ्चिति ऐतिहासिक उच्च हो । डलरको आधारमा पनि यस्तो सञ्चिति हालसम्मकै उच्च छ। यस्तो सञ्चिति २७ अर्ब ३८ करोड डलर छ ।
मुलुकमा रहेको विदेशी मुद्राको यस्तो सञ्चितिले १७ महिना ६ दिनको वस्तु तथा सेवाको आयात धान्न सक्छ ।
यो पर्याप्तता सूचक उच्च हो । नेपालमा सात महिनासम्मको आयात धान्ने सञ्चिति भए पर्याप्त भएको मानिन्छ ।
तर, पछिल्लो समय यो सञ्चिति सूचक घट्ने क्रममा छ । गत असारमा १९ महिनाभन्दा बढीको आयात धान्ने अवस्था रहेकोमा अहिले केही घटेको हो ।
दसैं तिहार लगायतका चाडपर्वमा आयात पनि बढ्ने भएकोले पनि यस्तो क्षमता केही घटेको देखिन्छ ।
यो अवधिमा आयात अघिल्लो पटकको यही अवधिभन्दा ३८ प्रतिशतले बढेर ६ खर्ब ४६ अर्ब रुपैयाँ पुगेको छ । त्यसअघि चार खर्ब ६८ अर्ब रुपैयाँको आयात भएको थियो ।