कप्तान रबि बोपाराले टस जितेपछि चितवनले निर्णय लिएको हो, जबकि दुवै टोलीले प्लेअफमा दुई–दुई खेलाडी परिवर्तन गरेका छन्।
काठमाडौँ — चितवन राइनोजले नेपाल प्रिमियर लिग (एनपीएल) क्रिकेटको इलिमिनेटरमा बुधबार काठमान्डु गोर्खाजविरुद्ध पहिले ब्याटिङ गर्ने भएको छ। चितवनका कप्तान रबि बोपाराले त्रिवि अन्तर्राष्ट्रिय क्रिकेट रंगशाला, कीर्तिपुरमा टस जितेर पहिले ब्याटिङ गर्ने निर्णय गरेका हुन्।
नियमित कप्तान जिम्बावेका सिकन्दर राजा अबुधाबी टी–१० खेल्न यूएई गएकाले पुनः रबि बोपाराले टोलीको नेतृत्व गर्न लागेका हुन्। बोपाराले प्रतियोगिताको पहिलो दुई खेलमा चितवनको कप्तानी गरेका थिए। अन्तर्राष्ट्रिय ड्युटीबाट आएपछि राजाले बोपारासँग कप्तानी लिएका थिए।
राजाको स्थानमा डेभिड मलान खेलिरहेका छन्। मलानलाई लिग चरणको अन्तिम खेलमा विश्राम दिइएको थियो। बोपाराले पनि पछिल्लो खेल खेलेका थिएनन्। उनले डान मुस्लीको स्थान लिनेछन्। त्यस्तै, चितवनले अशोक धामीको स्थानमा रन्जीत कुमारलाई खेलाएको छ।
काठमान्डुको टोलीमा दुई खेलाडी परिवर्तन गरिएको छ। सुमित महर्जनको स्थानमा साहिल पटेल र स्मित पटेलको स्थानमा साम हेजलेट खेलिरहेका छन्।
काठमान्डुले लिग चरणमा चितवनलाई १० रनले पराजित गरेको थियो। आठ फ्रेन्चाइज टोली सहभागी राउन्ड रोबिन लिगमा काठमान्डु तेस्रो र चितवन चौथो भएका थिए।
दुवै टोली दोस्रो पटक प्लेअफ खेलिरहेका छन्। यसअघिका दुवै अवसरमा चितवन र काठमान्डु इलिमिनेटरबाटै बाहिरिएका थिए।
विनोद पाण्डे कान्तिपुरका खेलकुद ब्यूरो प्रमुख हुन् ।