लिग चरणमा तेस्रो भएको काठमान्डुले ८ अंक जोडेको थियो भने चौथो चितवनले ७ अंकसहित प्लेअफ यात्रा तय गरेको थियो।
काठमाडौँ — चितवन राइनोज र काठमान्डु गोर्खाज बुधबार नेपाल प्रिमियर लिग (एनपीएल) क्रिकेटको इलिमिनेटरमा प्रतिस्पर्धा गरिरहेका छन् । आठ फ्रेन्चाइज टोली सहभागी राउन्ड रोबिन लिगमा काठमान्डु तेस्रो र चितवन चौथो भएका थिए ।
काठमान्डुले लिग चरणमा ८ अंक जोडेको थियो भने चितवनको खातामा ७ अंक थियो । चितवन ७ अंकमात्र लिएर प्लेअफ पुग्ने पहिलो टोली हो । टोलीले ३ खेल जितेको थियो भने लुम्बिनी लायन्ससँगको खेल वर्षाले रद्द बनाएको थियो ।
पहिलो खेलमा जनकपुर बोल्ट्ससँग पराजित काठमान्डुले त्यसपछिका लगातार चार खेल जितेको थियो । यी सबै चार खेलमा अस्ट्रेलियाका ब्याटिङ हस्ती डेविड वार्नर टोलीसँग रहेका थिए । उनी गएपछि काठमान्डुले लिग चरणका दुवै खेल हारेको थियो । अर्थात् वार्नरबिना काठमान्डुले कुनै खेल जित्न सकेको छैन ।
काठमान्डुले लिग चरणमा चितवनलाई १० रनले पराजित गरेको थियो । रशिद खानले ३० बलमा ५२ रन बनाएपछि काठमान्डुले निर्धारित २० ओभरमा ८ विकेट गुमाई १ सय ८० रन बनाएको थियो । रबि बोपाराले ३५ बलमा ५५ रन बनाए पनि जवाफमा आएको चितवनले ७ विकेट गुमाई १ सय ७० रनमात्र बनाउन सकेको थियो ।
काठमान्डु लगातार दोस्रो पटक प्लेअफ खेलिरहेको छ । काठमान्डुलाई उछिन्दै चितवनले दुई वर्षअघिको पहिलो सिजनमा प्लेअफ खेलेको थियो । यसअघिका दुवै अवसरमा चितवन र काठमान्डु इलिमिनेटरबाट बाहिरिएका थिए ।
विनोद पाण्डे कान्तिपुरका खेलकुद ब्यूरो प्रमुख हुन् ।