मालयन रि–इन्स्योरेन्सको नाफामा उच्च गिरावट देखिएको छ । कम्पनीले सार्वजनिक गरेको चालु आर्थिक वर्ष २०८३/८४ को पहिलो त्रैमासिकसम्मको अपरिष्कृत वित्तीय विवरण अनुसार नाफामा उच्च गिरावट आएको हो ।
चालु आर्थिक वर्षको असोज मसान्तसम्मको अवधिमा कम्पनीको नाफा १० करोड ३६ लाख ७८ हजार रुपैयाँमा सिमित भएको छ । जुन गत आर्थिक वर्षको सोही अवधिको भन्दा ५७.७२ प्रतिशतले कम हो । गत आर्थिक वर्षको सोही अवधिमा कम्पनीले २४ करोड ५८ लाख १४ हजार रुपैयाँ खुद नाफा आर्जन गरेको थियो । कम्पनीको खुद आर्जित बीमाशुल्कमा पनि उल्लेख्य गिरावट देखिएको छ । गत वर्षको असोजसम्म १ अर्ब १ करोड १० लाख ९ हजार रुपैयाँ रहेको यस्तो बीमाशुल्क चालु वर्षको सोही अवधिमा ५९ करोड १ लाख ९७ हजार रुपैयाँमा सीमित भएको छ । त्यसैगरी, कुल आम्दानी १ अर्ब २४ करोड ७२ लाख ४७ हजार रुपैयाँबाट घटेर ७९ करोड ६० लाख ६९ हजार रुपैयाँमा झरेको छ। कुल आम्दानीमा ३६.१७ प्रतिशतको संकुचन देखिएको छ ।
त्यस्तै, कम्पनीको कुल खर्च पनि गत वर्षको ९१ करोड ३ लाख ५३ हजार रुपैयाँबाट घटेर ६५ करोड ५९ लाख ६१ हजार रुपैयाँमा सीमित भएको छ। कमिसन खर्च २३ करोड ९ लाख ६९ हजार रुपैयाँबाट घटेर १२ करोड २७ लाख ४० हजार रुपैयाँमा झरेको छ । यसैगरी, कम्पनीले गत वर्षको सोही अवधिमा ५४ करोड ३० लाख ९४ हजार रुपैयाँ कुल दाबी भुक्तानी गरेकोमा चालु वर्षको असोजसम्म २० करोड २२ लाख ३९ हजार रुपैयाँ भुक्तानी गरेको छ ।
प्रतिसेयर आम्दानीसमेत ९ रुपैयाँ ५ पैसाबाट घटेर ३ रुपैयाँ ८२ पैसामा झरेको छ । त्यस्तै प्रतिसेयर नेटवर्थ ११४ रुपैयाँ ०८ पैसा रहेको छ । कम्पनीको चुक्ता पुँजी १० अर्ब ८६ करोड ८० लाख रुपैयाँ, विपत्ति कोष १४ करोड ४४ लाख १५ हजार रुपैयाँ र बीमा कोष ८३ करोड ४६ लाख ८६ हजार रुपैयाँमा स्थिर रहेका छन्।