छठ घाटमा सशस्त्र प्रहरीको उद्धार टोली परिचालन

पर्साका सबै छठ घाटमा दुर्घटना न्यूनीकरण तथा आकस्मिक उद्धारका लागि सशस्त्र प्रहरी, स्वास्थ्यकर्मी र सुरक्षाकर्मी खटाइएको छ ।

पर्सा — छठ पर्वका अवसरमा घाटहरूमा हुन सक्ने सम्भावित दुर्घटना न्यूनीकरण तथा दुर्घटना भइहाले तत्काल उद्धार गर्न सशस्त्र प्रहरीले उद्धार टोली परिचालन गरेको छ । सशस्त्र प्रहरी बल नेपाल नं १३ गण हेडक्वार्टर पर्साले मातहतका सबै युनिटलाई आ-आफ्नो कार्यक्षेत्रमा रहेका छठ घाटमा उद्धार टोलीसहित परिचालन गरेको हो ।

सशस्त्र प्रहरी पर्साका प्रमुख प्रहरी उपरीक्षक मोहनसिंह क्षेत्रीका अनुसार सर्वाधिक भीडभाड हुने वीरगन्जको घडिअर्वा पोखरीस्थित छठ घाटमा विशेष सतर्कता अपनाइएको छ । पोखरीमा व्रतालु तथा दर्शनार्थी डुब्न सक्ने जोखिमलाई मध्यनजर गर्दै मोटरबोटसहितको उद्धारकर्ता टोली खटाइएको उनले बताए ।

त्यसैगरी, विद्युत् जडित बत्तीबाट हुन सक्ने सम्भावित दुर्घटना रोक्न तालिमप्राप्त सुरक्षाकर्मी परिचालन गरिएको छ। घाटमा व्रतालु तथा दर्शनार्थीलाई स्वास्थ्य समस्या देखिए तत्काल उपचार उपलब्ध गराउन स्वास्थ्यकर्मीसहितको टोलीसमेत खटाइएको क्षेत्रीले जानकारी दिए ।

शंकर आचार्य कान्तिपुरका पर्सा संवाददाता हुन् ।