सशस्त्र प्रहरीमा रिक्त एक एआईजी पदमा तीन प्रतिस्पर्धी

एआईजी वंशीराज दाहालको पदावधि एक वर्ष थप गर्न गृह मन्त्रालयमा सिफारिस गरिएको थियो । तर, उनी बर्खास्त भएसँगै यो पद खाली छ ।

काठमाडौँ — सशस्त्र प्रहरी बलमा प्रहरी अतिरिक्त महानिरीक्षक (एआईजी) को एउटा पद रिक्त भएको छ । एआईजी वंशीराज दाहाललाई सरकारले बर्खास्त गरेसँगै उक्त पद रिक्त भएको हो ।

उनको पदावधि एक वर्ष थप गर्न गृह मन्त्रालयमा सिफारिस गरिएको थियो । तर उनी बर्खास्तमा परेसँगै यो पद खाली छ ।

सशस्त्र प्रहरी महानिरीक्षक (आईजीपी) रामशरण पौडेलले पदावधि थपका लागि मन्त्रालयमा सिफारिस गरिसकेका थिए । पूर्वप्रधानन्यायाधीश चोलेन्द्रशमशेर जबरालाई भेट्न मध्यराति प्रहरी कार्यालय पुगेको र फिक्सर इनाम सापकोटासँग सम्पर्क देखिएको आरोपमा उनलाई बर्खास्त गरिएको थियो ।

त्यसयता रिक्त एआईजी पदमा बढुवा प्रक्रिया अघि बढेको छैन । गृह मन्त्रालयका एक अधिकारीले कान्तिपुरसँग कुरा गर्दै बढुवा प्रक्रिया चाँडै सुरु हुने बताएका छन् । रिक्त पदमा बढुवाका लागि सशस्त्र प्रहरी बलका तीन प्रहरी नायब महानिरीक्षक (डीआईजी) सुरेश श्रेष्ठ, दीपेन्द्र शाह र पुरुषोत्तम थापा प्रतिस्पर्धामा छन् ।

श्रेष्ठ हाल सीमा सुरक्षा विभागमा कार्यरत छन् भने शाह इन्टेलिजेन्स ब्युरोको नेतृत्व गरिरहेका छन् । थापा भने सशस्त्र प्रहरी बलको एकेडेमीमा कार्यरत छन् ।