पहिरोको जोखिम कायमै रहेकाले घोप्टेभीरमा एक लेनबाट मात्रै सवारी सञ्चालन गरिएको सडक विभागका महानिर्देशक विजय जैसीले बताए । उक्त सडकखण्डको दीर्घकालीन समाधानका लागि विज्ञ तथा परामर्शदाता परिचालन गरिने उनले जानकारी दिए ।
काठमाडौँ — पृथ्वी राजमार्गअन्तर्गत मलेखु–मुग्लिन सडकखण्डको घोप्टेभीरमा हाल एक लेनबाट मात्रै सवारीसाधन सञ्चालन भइरहेको छ । पहिरोको जोखिम कायमै रहेकाले तत्काल दुई लेन सञ्चालन नगरिने सडक विभागले जनाएको छ ।
सडक विभागका महानिर्देशक विजय जैसीका अनुसार घोप्टेभीरमा गत साता तीन–चार दिनसम्म पानी नपर्दासमेत ड्राई स्लाइड(पहिरो खस्ने) समस्या देखिएको थियो । अग्लो भीर र ठाडो स्लोप भएकाले सानो ढुंगा वा माटो खस्दासमेत तल आइपुग्दा ठूलो असर पर्न सक्ने जोखिम रहेको उनले बताए ।
‘भीर अग्लो र स्लोप ठाडो भएकाले सानो कुरा गुडेर तल आउँदा पनि ठूलो असर पर्न सक्ने देखिन्छ । अहिले नै दुई लेन सञ्चालन गर्दा सडकमा लामो जाम हुन सक्छ । त्यसैले तत्काल एक लेनबाट मात्रै सवारी चलाएका छौं,’ जैसीले भने ।
तिहारको भाइटीकापछिको सवारी चापलाई ध्यानमा राखेर बिहीबार सडकमा सावधानीपूर्वक ट्राफिक व्यवस्थापन गरिएको उनले जानकारी दिए । रातिको समयमा उक्त खण्डमा सवारी साधन आवतजावतका लागि फ्लडलाइटको व्यवस्था गरिएको उनले बताए ।
उनका अनुसार दुई लेन सञ्चालनका लागि थप दुई-चार दिनपछि चारदेखि पाँच घण्टा काम गर्ने तयारी छ ।
‘दुई लेन सञ्चालन गर्न थप चार–पाँच घण्टा काम गर्ने तयारी छ । दीर्घकालीन समाधानका लागि परामर्शदाता नियुक्त गरेर भीरलाई स्थिर बनाउने उपाय खोज्छौं,’ जैसीले भने ।
घोप्टेभीरको पहिरो समस्याको दीर्घकालीन समाधानका लागि विज्ञ तथा परामर्शदाता परिचालन गरी अध्ययन गरिने उनले बताए । अध्ययनका आधारमा भीर स्थिरीकरण गर्ने र दीर्घकालीन समाधान खोजिने उनको भनाइ छ ।
विमल खतिवडा कान्तिपुरमा पूर्वाधार र आर्थिक बिटमा लेख्छन् ।
.jpg)
