घोप्टेभीरमा फेरि पहिरो, मलेखु–मुग्लिङ सडकखण्ड बन्द

२४ कात्तिक, काठमाडौं । पृथ्वी राजमार्गअन्तर्गत मलेखु–मुग्लिङ सडकखण्डको घोप्टेभीरमा फेरि सुक्खा पहिरो खसेको छ ।

जिल्ला प्रहरी कार्यालय धादिङका एसपी सुमित खड्काका अनुसार, गएराति ११ बजेतिर पहिरो गएको हो । पहिरोका कारण अहिले सो सडकखण्ड पूर्ण रुपमा अवरुद्ध भएको एसपी खड्काले अनलाइनखबरलाई जानकारी दिए ।

उनका अनुसार, अहिले पहिरो पन्छाउने काम भइरहेको छ ।

‘राति नै पहिरो गएपछि अहिले राजमार्ग बन्द छ । हामी पहिरो खुलाउने प्रयास गरिरहेका छौं,’ एसपी खड्काले भने ।

राजमार्ग अवरुद्ध भएपछि तिहार मनाउन गन्तव्यतर्फ हिंडेका यात्रुहरू बाटोमै अलपत्र परेका छन् ।

उक्त खण्डमा सवारीसाधनको लामो जाम लागेको र चाँडोभन्दा चाँडो खुलाउने प्रयास भइरहेको प्रहरीले जनाएको छ ।

यसअघि हिजो पनि सोही खण्डमा पहिरो खसेको थियो । उक्त पहिरो दिउँसो ९ घण्टापछि मात्रै हटाउन सकिएको थियो ।