साउदी अरबमा विवाहबिना बच्चा जन्माएको भन्दै ४० वर्षीया केन्याली महिला एस्थर वान्जा मुथोनीलाई १०० कोर्रा हान्ने सजाय सुनाइएको छ। उनी पाँच सन्तानकी आमा हुन्। उनले सन् २०२५ अगस्टमा साउदी अरबमा एक छोरालाई जन्म दिएकी थिइन्। त्यसपछि अस्पतालका कर्मचारीले प्रहरीलाई यसबारे जानकारी गराएका थिए।
प्रहरीले उनलाई नियन्त्रणमा लिएर मुद्दा चलाएको थियो। रियादको एक अदालतले अक्टोबरमा उनलाई विवाहबाहिर शारीरिक सम्बन्ध राखेको अभियोगमा दोषी ठहर गरेको थियो। मुथोनी एक वर्षदेखि आफ्नो सानो छोरा अबुडीसँगै केन्या फर्कने प्रयासमा छिन्। तर कानुनी कारबाहीका कारण उनी स्वदेश फर्कन सकेकी छैनन्।
अदालतले उनलाई १०० कोर्रा हान्ने र एक वर्षसम्म देशनिकाला गर्ने सजायसमेत सुनाएको छ। यद्यपि, उनलाई कोर्रा हान्ने मिति भने अहिलेसम्म तय भएको जानकारी सार्वजनिक भएको छैन।
मुथोनी साउदी अरबमा महारा ह्युमन रिसोर्सेस नामक कम्पनीमार्फत घरेलु कामदारका रूपमा कार्यरत थिइन्। सोही क्रममा उनको इजिप्टका महमुद नाम गरेका पुरुषसँग प्रेम सम्बन्ध भएको थियो। यही सम्बन्धबाट उनी गर्भवती भएकी थिइन्। पछि महमुद साउदी अरब छाडेर गए।
सन् २०२५ अगस्टमा मुथोनीले कम्पनीको कर्मचारी आवासमा छोरालाई जन्म दिइन्। उनकी सुपरभाइजरले उनलाई अस्पताल पुर्याएकी थिइन्। अस्पतालका कर्मचारीले भने प्रहरीलाई यसबारे जानकारी गराए।
प्रहरीको सोधपुछका क्रममा मुथोनीले बच्चाका पिता देश छाडेर गइसकेको बताएकी थिइन्।
रिहा भएपछि उनलाई कम्पनीको आवासमा पुनः बस्ने व्यवस्था मिलाइएन। एउटा आश्रयस्थलले समेत उनलाई राख्न अस्वीकार गर्यो। केन्याली दूतावासबाट पनि सहयोग नपाएपछि उनी बाध्य भएर रियादको एक पेट्रोल पम्पमा बस्न थालिन्। त्यहाँ उनीजस्तै आफ्ना बच्चासहित स्वदेश फर्कने प्रतीक्षामा रहेका अन्य प्रवासी महिला पनि थिए।
विवाहबिना बच्चा जन्माउने सबै महिलालाई सजाय हुँदैन
न्युयोर्क टाइम्सको अनुसन्धानअनुसार साउदी अरबमा विवाहबिना बच्चा जन्माउने धेरै महिलाले कुनै पनि कानुनी कारबाही भोग्नुपर्दैन। अखबारले यस्ता केही महिलासँग कुराकानी गरेको थियो। उनीहरूले विवाहबिना बच्चा जन्माएकै कारण आफूहरूमाथि कुनै सजाय नभएको बताएका थिए।
मुथोनीको हकमा किन कानुनी कारबाही अघि बढाइयो भन्ने कुरा भने स्पष्ट भएको छैन। अदालतको फैसलामा बच्चाका पितामाथि कुनै कारबाही गरिएको उल्लेखसमेत छैन।
साउदी अरबमा विवाहबिना बच्चा जन्माउने महिलाका सन्तानले प्रायः जन्मदर्ता प्रमाणपत्र पाउन कठिन हुने गरेको छ। यसका कारण उनीहरूलाई यात्रा गर्न र आफ्नो देश फर्कनसमेत समस्या हुने गरेको छ।
सन् २०२० मा कोर्रा हान्ने सजाय हटाइएको थियो
साउदी अरबको कानुनी व्यवस्था इस्लामिक कानुन अर्थात् शरियामा आधारित छ। त्यहाँ विवाहबाहिर शारीरिक सम्बन्ध राख्नुलाई अपराध मानिन्छ। यद्यपि, देशमा लिखित फौजदारी कानुन छैन। यस्ता मुद्दामा न्यायाधीशहरूले शरियाको आफ्नै व्याख्याका आधारमा फैसला सुनाउँछन्। यसले कुन व्यवहारमा कस्तो सजाय हुन्छ भन्ने कुरा निर्धारण गर्न कठिन बनाउँछ।
सन् २०२० मा साउदी अरबले केही अपराधमा कोर्रा हान्ने सजाय अन्त्य गर्ने निर्णय गरेको थियो। तर शरियामा सजाय निश्चित गरिएको मानिने अपराधमा भने यो परिवर्तन लागू भएन। विवाहबाहिर शारीरिक सम्बन्ध राख्ने र मदिरा सेवन गर्नेजस्ता अपराध यसअन्तर्गत पर्छन्।
मुथोनीलाई १०० कोर्रा हान्ने सजाय पनि धार्मिक कानुनको एक व्याख्याका आधारमा सुनाइएको हो। यस्तो सजाय दिने क्रममा महिलालाई कपडा लगाएकै अवस्थामा बसाएर बाँसको छडीले शरीरमा प्रहार गरिन्छ।
यद्यपि, साउदी अरबमा यस्ता मुद्दामा कति पटक कोर्रा हान्ने सजाय दिइन्छ भन्ने यकिन गर्न कठिन छ। त्यहाँका अदालतका फैसला सामान्यतया सार्वजनिक गरिँदैनन्।
प्रकाशित: २६ कार्तिक २०८३ १३:४१ बिहीबार
.jpg)
.jpg)
