प्रहरीका अनुसार, २५ वर्षीय आक्रमणकारी अति–दक्षिणपन्थी तथा अति–राष्ट्रवादी विचारधाराबाट प्रभावित थिए
काठमाडौँ — पोल्याण्डको क्राको सहरस्थित व्यस्त मुख्य चोकमा शनिबार एक व्यक्तिले अन्धाधुन्ध गोली चलाउँदा कम्तीमा छ जनाको मृत्यु भएको छ भने १५ जना घाइते भएका छन् । प्रहरीका अनुसार, २५ वर्षीय आक्रमणकारी अति–दक्षिणपन्थी तथा अति–राष्ट्रवादी विचारधाराबाट प्रभावित थिए ।
पोल्याण्डका रक्षामन्त्रीले ‘आतङ्कवादी कार्य’ भनेको उक्त आक्रमण क्राकोको प्रमुख पर्यटकीय क्षेत्र ओल्ड टाउनस्थित मेन स्क्वायरमा भएको हो । आक्रमणकारीले चोकका विभिन्न स्थानमा गाडी रोकेर स्वचालित हतियारबाट गोली चलाएका थिए । प्रहरीको जवाफी कारबाहीमा उनी घाइते भएका छन् ।
गृहमन्त्री मार्सिन किएरविन्स्कीले आक्रमणकारी अत्यन्त कट्टर र अति–राष्ट्रवादी विचार राख्ने व्यक्ति भएको बताए । 'सबै कुराले उनी अति–दक्षिणपन्थी विचारधाराबाट प्रभावित थिए भन्ने देखाउँछ,' उनले पत्रकार सम्मेलनमा भने ।
प्रधानमन्त्री डोनल्ड टस्कले आक्रमण भएको केही घण्टापछि आक्रमणकारीको घरबाट उनका तीन जना नजिकका नातेदारको शव फेला परेको जानकारी दिए । ती शव ओस्ट्रोभिएच स्विएन्तोक्रिज्स्की सहरस्थित घरमा भेटिएका थिए । मृतकमध्ये दुई महिला र एक पुरुष छन् ।
क्राकोमा भएको आक्रमणमा चार महिला र दुई पुरुषको मृत्यु भएको छ । मृतकमध्ये कम्तीमा तीन जना पोलिश र एक जना बेलायती नागरिक रहेको अधिकारीहरूले बताएका छन् । अन्य दुई जनाको पहिचान खुलाउने प्रयास भइरहेको छ ।
घाइतेमध्ये १३ जनालाई गम्भीर अवस्थामा अस्पताल भर्ना गरिएको थियो । आक्रमणकारीको पनि शल्यक्रिया गरिएको छ । घाइतेमध्ये पाँच जना विदेशी नागरिक रहेको प्रहरी कमाण्डर मारेक बोरोनले बताए । दुई प्रहरी अधिकारीसमेत गम्भीर घाइते भएका छन् ।
प्रहरी प्रवक्ता कातारजिना सिस्लोका अनुसार, आक्रमणकारीले सैनिक पोसाकजस्तो कपडा र बुलेटप्रुफ भेस्ट लगाएका थिए । उनको गाडीबाट थप हतियार र गोलीगठ्ठा बरामद भएको छ । प्रारम्भिक अनुसन्धानमा उन एक्लैले आक्रमण गरेको देखिएको प्रहरीले जनाएको छ ।
प्रत्यक्षदर्शीले सामाजिक सञ्जालमा सार्वजनिक गरेका भिडियोमा मानिसहरू चोकबाट भाग्दै गरेको र उद्धारकर्मीले घाइतेको उद्धार गरिरहेको देखिन्छ ।
क्राकोका मेयर लुकास गिबालाले बुधबारसम्म सहरमा आधिकारिक शोक मनाइने घोषणा गरेका छन् । घटनापछि राजधानी वार्साका मेयर राफाल ट्रास्काओस्कीले पुरानो सहरका मुख्य सडकमा अवरोधक राख्नेलगायत सुरक्षा व्यवस्था कडा पारिएको बताए ।
हेगस्थित अन्तरराष्ट्रिय आतङ्कवादविरोधी केन्द्रका अनुसन्धानकर्ता कास्पर रेकावेकले आक्रमणकारीको स्वरूप र हतियार युरोपका अन्य अति–दक्षिणपन्थी एकल आक्रमणकारीसँग मिल्दोजुल्दो रहेको बताएका छन् ।
उनका अनुसार पोल्याण्डमा यस्ता आक्रमणका प्रयास यसअघि पनि भएका थिए । पोल्याण्डमा सामूहिक गोलीकाण्ड दुर्लभ मानिन्छ ।
