गोरखाको सिर्दिबासबाट सुत्केरी र गर्भवतीको हेलिकप्टरमा उद्धार

नेपाली सेनाको हेलिकप्टरले आइतबार दुवै महिलालाई गोरखाको फिलिम र देवलबाट थापाथलीस्थित अस्पतालमा उपचारका लागि पुर्‍याएको छ।

गोरखा — गोरखाको चुमनुब्री गाउँपालिका–३ फिलिमबाट दुई जना महिलाको हेलिकप्टरमार्फत उद्धार गरिएको छ।

फिलिम स्वास्थ्य चौकीमा सात महिनामै बच्चा जन्माएकी २९ वर्षीया सुन्तली गुरुङलाई थप उपचारका लागि हेलिकप्टरबाट काठमाडौं पठाइएको छ।

चिकित्सकले सुविधासम्पन्न अस्पतालमा लैजान सल्लाह दिएपछि आमा र बच्चा दुवैलाई उद्धार गरिएको हो। त्यस्तै, चुमनुब्री–३ देवलकी २३ वर्षीया सुप्रिया गुरुङको सुत्केरी हुने मिति कटिसकेपछि उनलाई पनि हेलिकप्टरबाट काठमाडौं लगिएको छ।

दुवैलाई आइतबार नेपाली सेनाको हेलिकप्टरमार्फत थापाथलीस्थित अस्पताल पठाइएको जिल्ला प्रहरी कार्यालय गोरखाका डीएसपी राजकुमार श्रेष्ठले बताए।

हरिराम उप्रेती कान्तिपुरका गोरखा संवाददाता हुन् ।