मेलामा तिहार विशेष परिकार तथा परम्परागत खाद्य सामग्री, फूलमाला, सजावटका सामग्री, परम्परागत पोसाक, हस्तकलाका सामग्री, माटाका भाँडाकुाडा, रैथाने बाली, कृषि उपज तथा अन्य मौलिक र स्वदेशी उत्पादनलाई प्राथमिकता दिइने कम्पनीले जनाएको छ ।
काठमाडौँ — खाद्य व्यवस्था तथा व्यापार कम्पनी लिमिटेडले तिहार लक्षित तीनदिने ‘तिहार विशेष रैथाने मेला २०८३’ आयोजना गर्ने भएको छ ।
नेपाली मौलिक संस्कृति, रैथाने उत्पादन, स्थानीय उद्यमशीलता तथा स्वदेशी उत्पादनको प्रवर्द्धन गर्ने उद्देश्यले कम्पनीले आगामी कात्तिक २१ देखि २३ सम्म मेला आयोजना गर्ने भएको हो । काठमाडौं थापाथलीस्थित कम्पनीको बागमती प्रादेशिक कार्यालय परिसरमा मेला सञ्चालन हुनेछ ।
मेलामा तिहार विशेष परिकार तथा परम्परागत खाद्य सामग्री, फूलमाला तथा सजावटका सामग्री, परम्परागत पोसाक तथा हस्तकलाका सामग्री, माटाका भाँडाकुाडा, रैथाने बाली, कृषि उपज तथा अन्य मौलिक र स्वदेशी उत्पादनलाई प्राथमिकता दिइने कम्पनीले जनाएको छ ।
मेलामा आफ्ना उत्पादन बिक्री तथा प्रदर्शन गर्न इच्छुक कृषक, कृषक समूह, कृषि सहकारी संस्था, महिला तथा युवा उद्यमी र रैथाने तथा स्थानीय उत्पादनसँग सम्बन्धित व्यवसायीलाई स्टल सहभागिताका लागि आवेदन आहृवान समेत गरेको छ ।
मेलामा सहभागी हुन प्रतिस्टल पाँच हजार रुपैयाँ तोकिएको छ । इच्छुक उत्पादक तथा उद्यमीले आफ्नो व्यावसायिक विवरण, उत्पादनको प्रकृति र स्टल सहभागितासम्बन्धी प्रस्ताव कम्पनीको इमेलमार्फत पेस गर्न सक्नेछन् । प्राप्त आवेदन तथा प्रस्तावको मूल्यांकन व्यावसायिक उपयुक्तता, उत्पादनको मौलिकता, गुणस्तर र मेलाको उद्देश्यसँगको सान्दर्भिकताका आधारमा गरिने कम्पनीले जनाएको छ ।
