पाल्पाको निशान भगवतीमा चार पल्टनको निशान पूजा

निशान भगवती मन्दिरमा गोरखदल गण, सबुज गण, भवानी दल गण र बरख गणलगायतका पल्टनको निशान पूजा गरिएको छ ।

पाल्पा — बडादसैँको महानवमीका अवसरमा पाल्पाको तानसेनस्थित निशान भगवती मन्दिरमा नेपाल–अंग्रेज युद्धका समयमा स्थापना भएको सबुज गणसहितका निशानको मंगलबार विशेष पूजाआराधना गरिएको छ । नेपाली सेनाको ऐतिहासिक परम्परासँग जोडिएको निशान भगवतीमा सेनाका चार पल्टनको निशान पूजा गरिएको हो ।

निशान नेपाली सेनाको पल्टनको पहिचान, गौरव र इतिहाससँग जोडिएको पवित्र झण्डा भएकाले यसको बडादसैँ र चैतेदसैँको नवमीका दिन पूजा गर्ने प्रचलन रहेको दि फेमश महिन्द्र दल गणका गणपति शान्तकुमार थापाले बताए । निशान भगवती मन्दिरमा गोरखदल गण, सबुज गण, भवानी दल गण र बरख गणलगायतका पल्टनको निशान पूजा गरिएको छ । निशान झण्डामा अंकित हुने परम्परा रहेको छ । निशानलाई सैनिक एकाइको इतिहास र वीरताको प्रतीकका रूपमा लिइन्छ ।

नेपाली सेनाको परम्पराअनुसार निशान भगवतीको वर्षमा दुई पटक पूजा गरिन्छ । बडादसैँको महानवमी र चैतेदसैँको नवमीमा विशेष पूजाआराधना गर्ने चलन छ । यसले सैनिक परम्परा, धार्मिक आस्था र ऐतिहासिक विरासतलाई जोड्दै आएको छ । तानसेनस्थित पाल्पा दरबार परिसरमा नेपाली सेना र स्थानीय नागरिकको सहयोगमा निशान भगवती मन्दिर निर्माण गरिएको छ । करिब एक करोड रुपैयाँ लागतमा निर्माण भएको हो । मन्दिर निर्माणमा गोरखदल गण, तानसेन नगरपालिका, बगनासकाली गाउँपालिका, लुम्बिनी प्रदेश सरकार र स्थानीयवासीले सहयोग गरेका थिए । २३ वटा सैनिक युनिटबाट समेत निशान भगवती मन्दिर निर्माणका लागि आर्थिक सहयोग प्राप्त भएको थियो ।

मन्दिर परिसरमा आकर्षक बगैँचा र बालउद्यान निर्माण गरिएको छ । यहाँ पाल्पाली करुवा, रानीमहल, नेपालको नयाँ नक्सा, श्रीनगरबाट देखिने हिमशृङ्खलाको दृश्य र पाल्पाली ढाका झल्काउने चित्र राखिएका छन् । पिउने पानी र हरियाली बगैँचाको व्यवस्थाले परिसरलाई थप आकर्षक बनाएको छ । धार्मिक तथा ऐतिहासिक महत्त्व बोकेको निशान भगवती मन्दिर पछिल्लो समय स्थानीय नागरिकसँगै आन्तरिक र बाह्य पर्यटकका लागि समेत आकर्षणको केन्द्र बनेको छ ।

माधव अर्याल कान्तिपुरका पाल्पा संवाददाता हुन् ।