हिउँले बाटो पुरिएपछि २० जना मानिस र १०० वटा याक तथा झुपु परिचालन गरेर दुई दिनमा बाटो खोलियो ।
बझाङ — चीनको तिब्बतस्थित ताक्लाकोट बजारमा व्यापार गर्न गएका दार्चुलाका व्यापारी चार महिनापछि घर फर्किएका छन् ।
डेढ दिनको पैदल यात्रापछि ताक्लाकोट पुगेका छाङरु र टिंकरका करिब ९० जना व्यापारी पाँच फिटसम्म जमेको हिउँ छिचोल्दै घर फर्किएका हुन् ।
सिजनभन्दा अगावै हिमपात भएपछि फर्किने बाटो पुरिँदा आवतजावत कठिन बनेको थियो । हिउँ पन्छाउन मानिस, याक र झुपु (चौंरी) परिचालन गरिएको थियो । व्यास गाउँपालिका–१ का वडासदस्य हितेश बुढाथोकीका अनुसार सीमावर्ती क्षेत्रमा तिब्बततर्फ पाँच फिट र नेपालतर्फ तीन फिटभन्दा बढी हिउँ जमेको थियो ।
हिउँले बाटो पुरिएपछि २० जना मानिस, ६५ याक र ३५ वटा झुपु परिचालन गरी दुई दिन लगाएर बाटो खोलिएको उनले बताए । ‘असोजको तेस्रो हप्तातिर पनि अलिकति हिउँ परेको थियो । अर्णब चक्रवातका कारण हिजो/अस्ती हिउँ झन् थपिएकोले गाह्रो भयो । यसपालि सिजनभन्दा अगावै हिउँ पर्यो । त्यसैले फर्किन निकै कठिन भयो,’ बुढाथोकीले भने ।
व्यापारी टोलीसँगै नेपाल फर्किएका दार्चुला–ताक्लाकोट व्यापार संघका अध्यक्ष योगेश बोहराका अनुसार हिउँका कारण कतिपयलाई हिँड्नसमेत कठिन भएको थियो । केही व्यापारी राति ११ बजे मात्रै टिंकर पुगेका थिए । ‘योपालि हिउँले धेरै दुःख दियो,’ बोहराले भने ।
गत असारमा दार्चुलाका व्यापारीहरू नेपालबाट गुड, मिश्री तथा हस्तकलाका सामग्री लिएर ताक्लाकोट गएका थिए । फर्किँदा उनीहरूले जुत्ता, लत्ताकपडालगायत तिब्बतीसामान याक, घोडा, खच्चर र झुपुमा बोकेर ल्याएका छन् । पुस्तौंदेखि सीमापार मौसमी व्यापार गर्दै आएका व्यासी सौका समुदायका स्थानीयका लागि ताक्लाकोट व्यापार आम्दानीको एउटा प्रमुख आधार हो ।
कोरोना महामारीका कारण लामो समय रोकिएको दार्चुला–ताक्लाकोट मौसमी व्यापार सन् २०२४ देखि पुनः सञ्चालनमा आएको थियो । बझाङको उतरी भेग र दार्चुलाको व्यास गाउँपालिका–१ का छाङरु र टिंकरका स्थानीयहरु पुस्तौंदेखि ताक्लाकोट पुगेर वर्षको केही महिना व्यापार गर्दै आएका छन् । उनीहरू असारतिर ताक्लाकोट जाने र कात्तिक–मंसिरतिर फर्किने गर्छन् ।
ताक्लाकोटमा बझाङ र दार्चुलाका व्यापारीले पसल तथा होटलसमेत सञ्चालन गर्दै आएका छन् । डोकाडालासहित हस्तकलाका सामान बिक्री गर्न गएको साउनमा गएका बझाङका व्यापारीहरु भने तीन साता ताक्लाकोट बसेर भदौ पहिलो साता नेपाल फर्किसकेका छन् ।
वसन्तप्रताप सिंह कान्तिपुरका बझाङ संवाददाता हुन् ।
