ताप्लेजुङको मेरिङ्देन गाउँपालिकाले चीन सरकारबाट एक्स्काभेटर मेसिन अनुदानमार्फत प्राप्त गरेको हो । यसअघि सिमाना जोडिएको फक्ताङलुङ गाउँपालिकालाई पनि चीनले यस्तो मेसिन दिएको थियो ।
ताप्लेजुङ — मेरिङ्देन गाउँपालिकाले पनि चीन सरकारबाट एक्स्काभेटर मेसिन प्राप्त गरेको छ । एक करोड ७० लाख मूल्य बराबरको मेसिन अनुदानबापत प्राप्त गरेको गाउँपालिका अध्यक्ष युक हांबिर हाङगाम डम्बरले बताए ।
गाउँपालिका उपाध्यक्ष एवं नेपाली कम्युनिस्ट पार्टीका जिल्ला अध्यक्ष दुर्गाहाङ सिरेङ चङ्बाङले सिन्धुपाल्चोकको तातोपानी नाकामा पुगेर उक्त मेसिन बुझेका छन् । यसअघि चीनले आफ्नो देशसँग सिमाना जोडिएको फक्ताङलुङ गाउँपालिकालाई यस्तो मेसिन दिएको थियो ।
गाउँपालिकाका अध्यक्ष हाङगामका अनुसार पूर्वाधार विकास तथा सडक निर्माणका कामलाई गति दिन दुई वर्षअघि मेसिन माग गरिएको थियो । मेसिन एक साताभित्र गाउँपालिकामा ल्याइपुर्याउने उनले बताए ।
आनन्द गौतम कान्तिपुरका ताप्लेजुङ संवाददाता हुन् ।
