बागमती–४ स्थित झुरझुरे खेलमैदानमा हुने प्रतियोगितामा मच्छिन्द्र, चर्च ब्वाइज, नेपाल आर्मी, नेपाल पुलिस र सशस्त्र प्रहरी बललगायतका चर्चित टोली सहभागी हुनेछन्।
मकवानपुर — मकवानपुरको बागमती गाउँपालिकामा नवौं संस्करणको बागमती गोल्डकप राष्ट्रिय फुटबल प्रतियोगिता आगामी मंसिर ८ गतेदेखि सञ्चालन हुने भएको छ । मंसिर १७ गतेसम्म चल्ने प्रतियोगितामा देशभरका चर्चित ए डिभिजनका ६ क्लबसहित १० टोलीको सहभागिता रहने आयोजकले जनाएको छ ।
बागमती–४ स्थित झुरझुरे खेलमैदानमा हुने प्रतियोगितामा मच्छिन्द्र, चर्च ब्वाइज, नेपाल आर्मी, नेपाल पुलिस र सशस्त्र प्रहरी बललगायतका चर्चित टोली सहभागी हुनेछन् । प्रतियोगितामा मोफसलका चार टोलीले समेत प्रतिस्पर्धा गर्नेछन् ।
बागमती गाउँपालिकाको प्रयोजन तथा बागमती गाउँपालिका खेलकुद विकास समितिको आयोजनामा हुने प्रतियोगिता नकआउट प्रणालीमा सञ्चालन हुनेछ । प्रतियोगिताको विजेताले १० लाख रुपैयाँ र उपविजेताले ५ लाख रुपैयाँ नगद पुरस्कार प्राप्त गर्नेछन् ।
त्यस्तै, प्रतियोगिताको सर्वोत्कृष्ट खेलाडीलाई १ लाख ११ हजार १११ रुपैयाँ प्रदान गरिनेछ । उत्कृष्ट डिफेन्डर, मिडफिल्डर, फरवार्ड, गोलरक्षक र प्रशिक्षकलाई जनही २५ हजार रुपैयाँ तथा प्रत्येक खेलको म्यान अफ द म्याचलाई १० हजार रुपैयाँ प्रदान गरिने आयोजकले जनाएको छ ।
शुक्रबार हेटौंडामा आयोजित पत्रकार सम्मेलनमा प्रतियोगिताबारे जानकारी दिँदै गाउँपालिका अध्यक्ष सर्केश घलानले प्रतियोगिता सञ्चालन गर्न ७२ लाख रुपैयाँ खर्च हुने अनुमान गरिएको बताए ।
सुवास विडारी कान्तिपुरका मकवानपुर संवाददाता हुन् ।
.png)