हिमाली पर्यटन प्रवर्द्धनलाई खेलकुदसँग जोड्ने उद्देश्यले १८ कात्तिकमा क्रिकेट प्रतियोगिता हुनेछ । अपी हिमाल गाउँपालिकाले १७ देखि १९ कात्तिकसम्म प्रतियोगिता गर्न लागेको हो ।
धनगढी — समुद्री सतहबाट करिब ४ हजार मिटर उचाइमा रहेको दार्चुलाको अपी हिमाल बेसक्याम्पमा मैत्रीपूर्ण क्रिकेट प्रतियोगिता हुने भएको छ ।
हिमाली पर्यटन प्रवर्द्धनलाई खेलकुदसँग जोड्ने उद्देश्यले १८ कात्तिकमा क्रिकेट प्रतियोगिता हुनेछ । अपी हिमाल गाउँपालिकाले १७ देखि १९ कात्तिकसम्म प्रतियोगिता गर्न लागेको हो । ‘अपी हिमाल पर्यटन उत्सव २०८३’ अन्तर्गत धनगढी–११ र अपी–११ बीच मैत्रीपूर्ण क्रिकेट हुन लागेको हा । तराईको क्रिकेटलाई उच्च हिमाली क्षेत्रसम्म पुर्याउँदै अपी हिमालको पर्यटकीय सम्भावनालाई राष्ट्रिय तथा अन्तर्राष्ट्रिय स्तरमा चिनाउने उद्देश्यले प्रतियोगिता आयोजना गर्न लागिएको हो ।
गाउँपालिकाले बिहीबार पत्रकार सम्मेलनमार्फत प्रतियोगिताको उद्घाटन संघीय शिक्षा तथा खेलकुदमन्त्री सस्मित पोखरेलले गर्ने जानकारी दिएको छ । उत्सवको उद्घाटन सुदूरपश्चिम प्रदेशका मुख्यमन्त्री खगराज भट्टले गर्नेछन् ।
गिनिज वर्ल्ड रेकर्ड्सका अनुसार सन् २०१४ सेप्टेम्बर २६ मा तान्जानियाको किलिमन्जारो पर्वतमा समुद्री सतहबाट ५ हजार ७५२ मिटर उचाइमा क्रिकेट खेलिएको थियो । यसअघि सन् २१ अप्रिल २००९ मा नेपालको सगरमाथा क्षेत्रमा पर्ने गोरकसेपमा ५ हजार १६४ मिटर उचाइमा ‘द एभरेस्ट टेस्ट’ आयोजना भएको थियो । त्यसैले अपीमा हुन लागेको प्रतियोगिता विश्वकै उच्च स्थानमा हुने क्रिकेट खेल नभए पनि सुदूरपश्चिममा हिमाली पर्यटन प्रवर्द्धनका दृष्टिले महत्त्वपूर्ण मानिएको छ ।
७ हजार १३२ मिटर अग्लो अपी हिमालको काखमा रहेको बेसक्याम्प प्राकृतिक सौन्दर्य, हिमशृंखला, जैविक विविधता र साहसिक पदयात्राका लागि आकर्षक गन्तव्य हो । अपी–नाम्पा संरक्षण क्षेत्रअन्तर्गत पर्ने यस क्षेत्रमा पिलकन्द मैदान, उच्च हिमाली पाटन र कालीढुङ्गा ताललगायतका पर्यटकीय आकर्षण छन् ।
अपी क्षेत्रको प्राकृतिक तथा सांस्कृतिक पहिचानको प्रचारप्रसार गर्नुका साथै स्थानीय पर्यटन व्यवसाय, रोजगारी, आयआर्जन र ग्रामीण अर्थतन्त्रलाई टेवा पुर्याउने उद्देश्यले तीनदिने उत्सव आयोजना गर्न लागिएको गाउापालिकाले जनाएको छ ।
प्रतियोगिताको आयोजनामा फाप्ला अन्तर्राष्ट्रिय क्रिकेट मैदान तथा खेलग्राम विकास समितिका अध्यक्ष सुवास शाहीले सहकार्य गरेका छन् । उनले अपी हिमालको सुन्दर बेसक्याम्पमा क्रिकेटमार्फत पर्यटन प्रवर्द्धन गर्ने अभियानमा सहभागी हुन पाउँदा गौरव महसुस भएको बताएका छन् ।
क्रिकेटलाई खेलमा मात्रै सीमित नराखी पर्यटन प्रवर्द्धन, आर्थिक समृद्धि र क्षेत्रीय पहिचानसँग जोड्नुपर्ने उनको भनाइ छ । धनगढीदेखि अपी हिमालको बेसक्याम्पसम्म खेलकुदको पहुँच विस्तार गर्दै सुदूरपश्चिमलाई राष्ट्रिय तथा अन्तर्राष्ट्रिय स्तरमा चिनाउने अवसरका रूपमा उत्सवलाई लिनुपर्ने उनले बताए ।
अपी हिमाल गाउँपालिकाका अध्यक्ष भक्तसिंह बोहराले अपी क्षेत्रको पर्यटन विकास, प्रचारप्रसार र स्थानीय आर्थिक गतिविधि विस्तारलाई प्राथमिकतामा राखेर उत्सव आयोजना गर्न लागिएको बताए ।
‘अपीको पर्यटन विकास र प्रचारप्रसारका लागि यो उत्सव आयोजना गरिएको हो । उच्च हिमाली क्षेत्रमा आयोजना हुने मैत्रीपूर्ण क्रिकेट प्रतियोगिताले अपीको पर्यटकीय सम्भावनालाई थप उजागर गर्ने विश्वास लिएका छौं,’ अध्यक्ष बोहराले भने । उनले उत्सवमा सहभागी भएर सफल बनाउन सबैलाई आग्रह गरेका छन् ।
यसअघि प्रधानमन्त्री बालेन्द्र शाहले अपी हिमाल बेसक्याम्पमा क्रिकेट खेलिरहेको दृश्यसहितको भिडियो सामाजिक सञ्जालमा साझा गरेपछि अपी क्षेत्रले थप चर्चा पाएको थियो । प्रधानमन्त्रीको भिडियो सार्वजनिक भएपछि अपी हिमालप्रति पर्यटकको आकर्षण बढ्नुका साथै पर्यटकको आवागमनसमेत वृद्धि भएको गाउँपालिकाले जनाएको छ ।
टेकराज जोशी कान्तिपुरका धनगढी संवाददाता हुन्।
