जिल्ला प्रशासन कार्यालयले १२ देखि १५ कात्तिकसम्म लमजुङ हुँदै मनाङको सिमानासम्म सवारी साधनलाई राति ७ बजेदेखि बिहान ६ बजेसम्म आवागमनमा रोक लगाएको जनाएको छ ।
लमजुङ — सम्भावित भारी वर्षा, बाढीपहिरो, हिमपातसहित विपद्को जोखिमलाई मध्यनजर गर्दै मनाङ जोड्ने एकमात्र बेँसीसहर–चामे सडकमा रातको समय सवारी साधन सञ्चालनमा रोक लगाइएको छ ।
जिल्ला प्रशासन कार्यालय लमजुङले सूचना जारी गरी रातिको समयमा अनावश्यक यात्रा नगर्न र सुरक्षित रहन आग्रह गरेको छ ।
प्रशासनले १२ देखि १५ कात्तिकसम्म लमजुङ हुँदै मनाङको सिमानासम्म सवारी साधनलाई राति ७ बजेदेखि बिहान ६ बजेसम्म आवागमनमा रोक लगाएको जनाएको छ । प्रमुख जिल्ला अधिकारी कृष्णप्रसाद खनालले हिमपात र वर्षा हुँदा मर्स्याङ्दी नदी र आसपासका खोलाहरू बढ्न सक्ने, सडकमा पहिरो खस्न र झर्न सक्ने भन्दै रातको समय उद्धार गर्न कठिन हुने भएकाले बेँसीसहर–चामे सडक रातको समय बन्द गर्नुपरेको बताए ।
जिल्ला प्रशासन कार्यालय मनाङले पनि लमजुङतर्फ सीमाक्षेत्रसम्म रातको समय सवारी आवागमनमा रोक लगाएको जनाएको छ । मनाङका सहायक प्रमुख जिल्ला अधिकारी कृष्णप्रसाद पौडेलले हिमपात, वर्षा हुँदा बाढीपहिरोको सम्भावना बढ्ने भएकाले रातको समय यात्रा गर्न रोक लगाएको बताएका छन् ।
जिल्ला प्रशासन कार्यालय लमजुङले सम्भावित विपद्को अवधिमा अत्यावश्यक कामबाहेक यात्रा नगर्न सर्वसाधारणलाई अनुरोध समेत गरेको छ । भारी वर्षाका कारण बाढीपहिरो, सडक अवरुद्ध हुने तथा अन्य जोखिम निम्तिन सक्ने भएकाले सुरक्षित स्थानमा रहन र आवश्यक सतर्कता अपनाउन आग्रह गरिएको प्रशासकीय अधिकृत माधवप्रसाद वाग्लेले बताए ।
नदी किनार, सडक छेउछाउ तथा बाढीपहिरोको जोखिम भएका क्षेत्रमा विशेष सावधानी अपनाउन समेत प्रशासनले आग्रह गरेको छ । कृषि कार्यमा संलग्न किसानलाई पनि मौसमको प्रतिकूलतालाई ध्यानमा राख्दै आवश्यक सतर्कता अपनाउन आग्रह गरिएको सहायक प्रमुख जिल्ला अधिकारी दीपक पौडेलले बताए ।
आश गुरूङ कान्तिपुरका लमजुङ संवाददाता हुन् ।
