वेल्स फुटबल संघ (एफएडब्लू) ले फिफा अध्यक्ष जियानी इन्फान्टिनोले पद छाड्नुपर्ने आफ्नो अडान यथावत् रहेको जनाएको छ।
संघका प्रमुख कार्यकारी नोएल मुनीले विश्व फुटबलको शासन प्रणालीमा सुधार आवश्यक रहेको बताउँदै इन्फान्टिनोको पुनः निर्वाचनलाई समर्थन नगर्ने निर्णयमा कुनै परिवर्तन नभएको स्पष्ट पारेका छन्।
इन्फान्टिनोले हालै विश्व फुटबलको ‘विशाल बहुमत’ आफ्नो पक्षमा रहेको दाबी गरेका थिए। विश्व फुटबलको सर्वोच्च निकाय फिफाका प्रतियोगितामा निजी लगानीकर्तालाई हिस्सेदारी बिक्री गर्ने प्रस्तावलाई लिएर विवाद बढेपछि उनले राजीनामा दिनुपर्ने माग उठेको थियो।
मुनीका अनुसार एफएडब्लूले अगस्टको सुरुमै इन्फान्टिनोलाई दिएको समर्थन फिर्ता लिएको थियो। उनको पुनः निर्वाचनलाई समर्थन नगर्ने घोषणा गर्ने आफूहरू विश्वकै पहिलो देश भएको दाबी गर्दै मुनीले संघको धारणा परिवर्तन नभएको बताएका छन्।
‘विश्व फुटबलको शासन प्रणालीको समीक्षा आवश्यक छ। अहिलेको प्रणालीले हाम्रो हितमा काम गरिरहेको छैन,’ मुनीले भनेका छन्।
उनले फिफा अध्यक्षमा खेलको हितलाई प्राथमिकता दिने र नैतिक जिम्मेवारी बहन गर्न सक्ने नेतृत्व आवश्यक रहेको बताए। फुटबलको सर्वोच्च निकायको अध्यक्षसँग अत्यधिक शक्ति केन्द्रित हुनु उचित नभएको उनको भनाइ छ।
फिफाका प्रतियोगितामा निजी लगानीकर्तालाई हिस्सेदारी बिक्री गर्ने योजनालाई ‘फिफा फरवार्ड इन्टरप्राइज’ (एफएफई) प्रस्तावका रूपमा अघि सारिएको थियो। जुलाईमा सार्वजनिक भएको उक्त योजनाले फिफाको निर्णय प्रक्रिया र पारदर्शितामाथि प्रश्न उठाएको छ।
इन्फान्टिनोले यसै महिनाको सुरुवातमा प्रस्तावबारे सञ्चार र परामर्श प्रक्रियामा कमजोरी भएको स्वीकार गर्दै फिफा काउन्सिलसँग माफी मागेका थिए।
युरोपेली फुटबलको सर्वोच्च निकाय युईएफएले पनि एफएफई प्रस्तावसँग सम्बन्धित शासन प्रणाली र निर्णय प्रक्रियाका महत्त्वपूर्ण कागजात सार्वजनिक गर्न तथा उठेका प्रश्नको जवाफ दिन फिफालाई आग्रह गरेको छ। युईएफएले यसका लागि नोभेम्बर २ सम्मको समयसीमा दिएको छ।
मुनीले विवाद इन्फान्टिनोको नेतृत्वमा मात्र सीमित नभई समग्र फिफाको शासन प्रणालीसँग जोडिएको बताए। विश्व फुटबलमा एक व्यक्तिमा अत्यधिक शक्ति केन्द्रित हुने अवस्थाको अन्त्य गर्दै संस्थागत जवाफदेहिता बढाउनुपर्ने उनको धारणा छ।
सन् २०१६ देखि फिफाको नेतृत्व गर्दै आएका इन्फान्टिनोमाथि पछिल्लो विवादले नेतृत्व र निर्णय प्रक्रियाबारे थप प्रश्न खडा गरेको छ।
प्रकाशित: ११ कार्तिक २०८३ ०९:४१ बुधबार
