प्लेअफ पुग्ने झिनो आशालाई जिवितै राख्न जित्नै पर्ने खेलमा जनकपुरले फितलो ब्याटिङ गरेको हो । चितवनलाई प्ले अफमा पुग्न बाँकी रहेको दुबै खेल जित्नै पर्ने अवस्था रहेको छ ।
काठमाडौँ — नेपाल प्रिमियर लिग (एनपीएल) क्रिकेटमा शुक्रबारको दोस्रो खेलमा जनकपुर बोल्ट्सले चितवन राइनोजविरुद्ध निराशाजनक ब्याटिङ गरेको छ । पहिलो सिजनको च्याम्पियन जनकपुरले टस जितेर ब्याटिङ रोजेपछि निर्धारित २० ओभरमा ९ विकेट गुमाई ८८ रनमात्र बनाउन सक्यो ।
प्लेअफ पुग्ने झिनो आशालाई जिवितै राख्न जित्नै पर्ने खेलमा जनकपुरले फितलो ब्याटिङ गरेको हो । चितवनलाई प्ले अफमा पुग्न बाँकी रहेको दुबै खेल जित्नै पर्ने अवस्था रहेको छ ।
तृतराज दास ९ बल खेली ५ रन बनाई रन्जीत कुमारको बलमा आउट भए । चितवनका कप्तान सिकन्दर राजाले आफ्नै देश जिम्बावेका ब्याटर रायन बर्ललाई ६ रनमा बोल्ड गरी दोस्रो सफलता दिलाए । देव्रेहाते स्पिनर रन्जीतले ओपनर सन्तोष कार्की र हयारी ट्रक्टरलाई आउट गरेपछि चितवनले खेल पूर्णरुपमा नियन्त्रणमा लियो ।
प्रतियोगितामा पहिलो खेल खेलिरहेका सन्तोषले १ छक्कासहित ११ बलमा १० रन बनाए भने ट्रक्टरले खाता खोल्न पनि भ्याएनन् । विशाल सुस्लिङले १३ बल खेली समान १ चौका र छक्कासहित १५ रन बनाए । तर जिम्मी निसम शून्य र अभिषेक तिवारी ४ रनमा आउट भएपछि जनकपुर ६२–७ को स्थितिमा पुगेको थियो ।आदित्य महता २६ बल खेली ४ रनमा आउट भएका थिए ।
कप्तान हरमित सिंहले सर्वाधिक २५ रन बनाए । २५ बल खेली २ चौका र १ छक्का प्रहार गरी उनी अन्तिम ओभरमा आउट भए । इनिङ्सको अन्तिम बलमा छक्का प्रहार गरेका राहुल यादव १० बल खेली १० र ललित राजवंशी २ रन बनाई अविजित रहे ।
चितवनका रन्जीत कुमारले ३ ओभरमा १ मेडन राख्दै २ रनमात्र खर्चेर ३ विकेट लिए । सिकन्दरले ४ ओभरमा २ मेडन राख्दै १० र कामिल मिसराले ३ ओभरमा १८ रन खर्चेर २–२ विकेट लिए । कमलसिंह ऐरी र रिजन ढकालको नाममा १–१ विकेट रहयो ।
विनोद पाण्डे कान्तिपुरका खेलकुद ब्यूरो प्रमुख हुन् ।
