एक करोड २० लाख रुपैयाँ लागतका प्रणाली सञ्चालनमा आएपछि धनकुटा नगरपालिकाका-३, ४ र ६ का ११ सय परिवार लाभान्वित हुनेछन्।
धनकुटा — धनकुटा बजारमा वितरण हुने खानेपानी शुद्धीकरणका लागि दुई ठूला प्रशोधन प्रणाली (ट्रिटमेन्ट प्लान्ट) सञ्चालनको तयारी गरिएको छ ।
संघीय खानेपानी तथा ढल व्यवस्थापन कार्यालयले धनकुटा बजारको स्कुलडाँडा र सल्लेरीमा निर्माण गरिरहेका दुवै प्रशोधन प्रणालीको काम अन्तिम चरणमा पुगेको जनाएको छ । एक करोड २० लाख रुपैयाँको लागतमा निर्माण भइरहेका यी दुई छुट्टाछुट्टै प्रणालीबाट प्रतिसेकेन्ड २० लिटर पानी प्रशोधन गर्न सकिनेछ ।
प्रशोधन प्रणाली सञ्चालनमा आएपछि धनकुटा नगरपालिकाका-३, ४ र ६ का ११ सय परिवारले स्वच्छ खानेपानी पाउने संघीय खानेपानी तथा ढल व्यवस्थापन कार्यालयका प्रमुख हेराकाजी महर्जनले बताए । उनले भने, 'दुवै प्रशोधन प्रणालीको निर्माण कार्य अन्तिम चरणमा पुगेको छ । सञ्चालनमा आएपछि तीनवटा वडाका ११ सय परिवारलाई प्रशोधित खानेपानी उपलब्ध हुनेछ ।'
यसअघि निर्माण गरिएका साना क्षमताका पानी शुद्धीकरण प्रणाली पुराना हुँदै गएपछि नयाँ पूर्वाधार निर्माण थालिएको महर्जनले बताए । दिगो विकास लक्ष्यअनुसार सन् २०३० सम्म हरेक घरमा स्वच्छ खानेपानी पुर्याउने लक्ष्यलाई ध्यानमा राखेर खानेपानी पूर्वाधार सुधार तथा विस्तारको काम भइरहेको उनको भनाइ छ ।
धनकुटा सदरमुकाममा धनकुटा नगर खानेपानी तथा सरसफाइ उपभोक्ता समितिमार्फत खानेपानी आपूर्ति हुँदै आएको छ । समितिले बजार क्षेत्रका करिब ४ हजार उपभोक्तालाई खानेपानी वितरण गर्दै आएको छ ।
विनोद घिमिरे कान्तिपुर संवाददाता हुन्।