राष्ट्रिय विभूति तथा समाज सुधारक महागुरु फाल्गुनन्द लिङ्देनको १ सय ४२ औं जन्मजयन्तीको अवसरमा गाउँपालिकामा आयोजित कार्यक्रममा विद्यार्थीलाई शैक्षिक सामग्री वितरण र उत्कृष्ट विद्यार्थीलाई पुरस्कृत गरिएको हो ।
पाँचथर — कुम्मायक गाउँपालिकाका ३५ विद्यालयका २ सय ६८ विद्यार्थीलाई शैक्षिक सामग्री वितरण गरिएको छ । त्यस्तै, कक्षा १२ को परीक्षामा उत्कृष्ट नतिजा ल्याउने पाँच विद्यार्थीलाई नगदसहित सम्मान गरिएको छ ।
राष्ट्रिय विभूति तथा समाज सुधारक महागुरु फाल्गुनन्द लिङ्देनको १ सय ४२ औं जन्मजयन्तीको अवसरमा गाउँपालिकामा आयोजित कार्यक्रममा विद्यार्थीलाई शैक्षिक सामग्री वितरण र उत्कृष्ट विद्यार्थीलाई पुरस्कृत गरिएको हो । कात्तिक २५ गते परेको जन्मजयन्ती तिहार बिदाका कारण पूजामा मात्रै सीमित गरिएको थियो । विद्यार्थीलाई शैक्षिक सामग्री वितरण तथा सम्मान कार्यक्रम भने मंसिर २ गते आयोजना गरिएको हो ।
कार्यक्रममा दुई संस्थागत र ३३ सामुदायिक विद्यालयका कक्षा ४ र ५ मा अध्ययनरत २ सय ६८ विद्यार्थीलाई शैक्षिक सामग्री प्रदान गरिएको थियो ।
त्यस्तै, २०८२ सालको कक्षा १२ परीक्षामा उत्कृष्ट नतिजा ल्याउने पाँच विद्यार्थी पुरस्कृत भए । पृथ्वी माध्यमिक विद्यालय यासोकको प्राविधिक धारतर्फबाट ३.६५ जीपीए ल्याउने तारा खड्का र ३.४८ जीपीए ल्याउने कुम्मायक–५ का जेनिश खतिवडा तथा साधारण धारतर्फबाट ३.४३ जीपीए ल्याउने कुम्मायक–१ का रवि लावतीलाई जनही ५ हजार रुपैयाँ र सम्मानपत्र प्रदान गरियो ।
त्यस्तै, सिद्ध सरस्वती माध्यमिक विद्यालय माङ्जाबुङबाट ३.४२ जीपीए ल्याउने कुम्मायक–२ की अन्जु सेर्मा र पृथ्वी माध्यमिक विद्यालय यासोकबाट ३.४२ जीपीए ल्याउने कुम्मायककी अनुसा चम्लागाईलाई जनही २ हजार ५ सय रुपैयाँ र सम्मानपत्र प्रदान गरिएको थियो ।
महागुरु फाल्गुनन्द लिङ्देन शालिक संरक्षण तथा संवर्द्धन अक्षयकोषबाट विद्यार्थीलाई शैक्षिक सामग्री वितरण र उत्कृष्ट विद्यार्थीलाई पुरस्कृत गरिएको अक्षयकोषका अध्यक्ष सूर्यविक्रम चेम्जोङले जानकारी दिए ।
अक्षयकोषमा हालसम्म साँवा र ब्याजसहित ४८ लाख ५० हजार रुपैयाँ जम्मा भएको कोषका उपाध्यक्ष तथा कार्यवाहक अध्यक्ष देवेन्द्रकुमार लावतीले बताए ।
गाउँपालिका अध्यक्ष बमप्रसाद लावतीको प्रमुख आतिथ्य र उपाध्यक्ष महेन्द्र खड्काको विशेष आतिथ्यमा कार्यक्रम सम्पन्न भएको थियो ।
लक्ष्मी गौतम कान्तिपुरका पाँचथर संवाददाता हुन् ।