स्वास्थ्य, इन्जिनियरिङ, कृषि र होटल व्यवस्थापनका पुनर्योग तथा साउनमा सञ्चालित प्रिडिप्लोमा मौका परीक्षाको नतिजा सार्वजनिक भएको हो।
काठमाडौँ — प्राविधिक शिक्षा तथा व्यावसायिक तालिम परिषद् (सीटीईभीटी) ले लामो समयदेखि रोकिएको विद्यार्थीको परीक्षाफल प्रकाशित गरेको छ।
सीटीईभीटीका विभिन्न तह र विषयको परीक्षा, मौका परीक्षा र पुनर्योगको समेत परीक्षाफल प्रकाशनमा ढिलाइ हुँदा विद्यार्थी मारमा परेपछि शिक्षा सचिवको उपस्थिति र सदस्यसचिवको अध्यक्षतामा बैठक बसी परीक्षाफल प्रकाशित गरेको छ।
सीटीईभीटीको नियमावलीमा उपाध्यक्ष परीक्षा समितिको अध्यक्ष रहने व्यवस्था भए पनि विनियमावलीलाई आधार मानेर सदस्यसचिवको अध्यक्षतामा मंगलबार बैठक बसी परीक्षाफल प्रकाशित गरेको हो।
उपाध्यक्ष पद रिक्त हुँदा डिप्लोमा र प्रिडिप्लोमा तहका स्वास्थ्य, इन्जिनियरिङ, कृषि, होटल व्यवस्थापनलगायतका विषयहरूको पुनर्योगको नतिजा प्रकाशन र साउनमा लिइएको प्रिडिप्लोमा तहको मौका परीक्षाको परीक्षाफल प्रकाशन गर्न ढिलाइ भएको थियो।
८ महिनाअघि रिटोटलिङका लागि निवेदन दिएका विद्यार्थीको समेत अहिलेसम्म निर्णय हुन सकेको छैन ।
नारायण किलम्बू कान्तिपुर टेलिभिजनमा कार्यरत छन् ।