दसैंको अवसरमा आर्थिक अभावले माइती जान नसक्ने चेलीलाई लक्षित गरी चार दिन सञ्चालन गरिएको अभियानमार्फत निःशुल्क यातायात सेवा दिइएको हो ।
खोटाङ — खोटाङमा सञ्चालित ‘दसैं–तिहार, चेलीलाई उपहार’ अभियानमा ६ सय ४७ जना चेलीले निःशुल्क बाइक सेवा पाएका छन् । अभावमा गुज्रिरहेका चेलीहरूलाई लक्षित गरी दसैंको अवसरमा शुक्रबारसम्म चार दिन सञ्चालन गरिएको अभियानमा ६ सय ४७ जना चेलीलाई मोटरसाइकलबाट निःशुल्क यातायात सेवा उपलब्ध गराइएको हो ।
अभियानका सचिवालय प्रमुख निराजन ढकालका अनुसार अभियानको अन्तिम दिन दुई सय ३० जना, तेस्रो दिन दुई सय ५२ जना, दोस्रो दिन एक सय १० जना र पहिलो दिन ५० जना चेलीलाई निःशुल्क बाइक सेवा दिइएको हो ।
तिहारको अवसरमा पनि कात्तिक २४ गतेदेखि २६ गतेसम्म तीन दिन सेवा दिइने अभियानका संयोजक सञ्जयकुमार राईले सुनाए । आर्थिक अभावले माइतीसम्म जान नसक्ने चेलीहरूलाई निःशुल्क रूपमा सेवा दिइएको राईले जनाए । ‘चाडबाडमा आर्थिक अभावले माइतीसम्म जान नसक्ने चेलीहरूलाई निःशुल्क बाइक सेवा उपलब्ध गराइएको हो,’ राईले भने, ‘यसका साथै सिर्जनशील काममा युवाहरूलाई क्रियाशील गराउनका लागि पनि यो अभियान सञ्चालन गर्दै आएका छौँ ।’
यो अभियान तीन वर्षदेखि सञ्चालन गरिँदै आएको छ । गत वर्ष ७ सय ५० जना र अघिल्लो वर्ष ५ सय जना चेलीले सेवा पाएको राईको भनाइ छ ।
डम्बरसिं राई कान्तिपुरका खोटाङ संवाददाता हुन् ।
(170).png)
