आर्थिक अभावका कारण माइती–मावली जान नसक्ने चेलीलाई निःशुल्क बाइक सेवा दिइएको हो ।
खोटाङ — तिहारको अवसरमा सञ्चालित ‘दसैं–तिहार, चेलीलाई उपहार’ अभियानमा ३ सय ७ जना चेलीले निःशुल्क बाइक सेवा पाएका छन् । यातायातको पहुँचबाहिरका चेलीहरूलाई घरदेखि माइतीसम्म र माइतीदेखि घरसम्म निःशुल्क बाइक सेवा दिइएको हो ।
गत मंगलबारदेखि सञ्चालन गरिएको अभियान बिहीबार समापन भएको हो । यसअन्तर्गत बिहीबार ७० जना चेलीले निःशुल्क सेवा पाएका छन् । त्यस्तै बुधबार १ सय १ जनालाई र मंगलबार १ सय ३८ जनालाई निःशुल्क सेवा दिइएको अभियानको सचिवालयकी अञ्जना आचार्यले बताइन् ।
आर्थिक अभावका कारण यातायातको पहुँचबाहिर रहेका चेलीहरूलाई घरबाट माइतीसम्म र माइतीबाट घरसम्म पुर्याइएको अभियानका संयोजक सञ्जयकुमार राईले बताए । ‘अभावमा माइती–मावली गर्न नसक्ने चेलीहरूका लागि यो अभियान सञ्चालन गरिएको हो,’ राईले भने, ‘तिहारको अवसरमा ३ दिनसम्म सञ्चालन गरिएको अभियानमा ३ सय ७ जनाले सेवा पाउनुभएको छ । दसैंमा ६ सय ४७ जना चेलीले सेवा पाउनुभएको थियो ।’
डम्बरसिं राई कान्तिपुरका खोटाङ संवाददाता हुन् ।
(170).png)
