सौराहामा पर्यटकको चहलपहल बढ्यो [तस्बिरहरू]

दसैंको टीकापछि आन्तरिक र बाह्य पर्यटक बढेसँगै सौराहाका होटल तथा रेस्टुरेन्टमा अकुपेन्सी ७५ प्रतिशत पुगेको पर्यटन व्यवसायीले बताएका छन् ।

दसैंअघि सौराहाको बाघमारास्थित डुंगाघाटमा पर्यटक सुनसान थिए । शुक्रबार अपराह्न पुग्दा अवस्था ठीक उल्टो थियो । आन्तरिक तथा बाह्य पर्यटक डुंगा सयर गर्न पालो कुर्दै थिए । बुटवलकी बन्दना ढुंगाना डुंगा सयर गर्न परिवारसहित पुगेकी थिइन् । उनीजस्तै थुप्रै आन्तरिक पर्यटक डुंगा सयर गर्न पुगेका थिए ।

पर्यटकीय नगरी सौराहामा दसैंपछि पर्यटकको चहलपहल बढेको छ । दसैंको टीकापछि सौराहा घुम्न आउने आन्तरिक तथा बाह्य पर्यटकको चहलपहल बढेको पर्यटन व्यवसायी बताउँछन् । ‘बिहीबारदेखि पर्यटक ओइरिएका छन् । आन्तरिक मात्रै होइन, विदेशी पर्यटकको उपस्थिति पनि राम्रो देखिन्छ,’ पर्यटन व्यवसायी सुमन घिमिरेले भने ।

सौराहामा अहिले हात्ती सफारी, डुंगा सयर, जिप सफारी र जंगल वाकका लागि पर्यटकको भीड लागेको छ । आगामी दिनमा पनि यस्तै पर्यटकको उपस्थिति रहनेमा पर्यटन व्यवसायी आशावादी छन् । पर्यटन व्यवसायीका अनुसार बिहीबारदेखि सौराहाका होटल तथा रेस्टुरेन्टमा ७५ प्रतिशत अकुपेन्सी छ । दसैंअघि यहाँ ५ देखि १० प्रतिशतको हाराहारीमा मात्रै अकुपेन्सी थियो । भोटेकोशी बाढीपछि करिब ८० प्रतिशत पर्यटकले होटल बुकिङ रद्द गरेपछि पर्यटन व्यवसायी निराश थिए । अहिले पर्यटकको चहलपहलले व्यवसायीलाई आशावादी बनाएको छ ।

राजु चौधरी कान्तिपुर टेलिभिजनका चितवन संवाददाता हुन् ।