धादिङको रुवीभ्याली–४ कलदाङमा राति उकालो बाटोबाट बोलेरो खस्दा ६६ वर्षीया छेनेन तामाङको घटनास्थलमै मृत्यु भएको हो, चालकसहित सात जना घाइते भएका छन्।
काठमाडौँ — उत्तरी धादिङको रुवीभ्याली गाउँपालिका–४, कलदाङमा गएराति बोलेरो गाडी दुर्घटना हुँदा एक जनाको मृत्यु भएको छ भने चालकसहित ७ जना घाइते भएका छन् । मृत्यु हुनेमा स्थानीय ६६ वर्षीया छेनेन तामाङ रहेकी छन् । उनको घटनास्थलमै मृत्यु भएको हो ।
लापाबाट बोराङको बतासे एकादशी जात्रातर्फ जाँदै गरेको बा.प्र. ०२–०३३ च ७१६९ नम्बरको बोलेरो राति करिब १ बजेर ३० मिनेटमा उकालो बाटोमा अनियन्त्रित भई करिब २ सय मिटर तल खसेको थियो ।
दुर्घटनामा घाइते भएकाहरूलाई सुरुमा बोराङ स्वास्थ्य चौकी लगिएको थियो । तीमध्ये स्थानीय स्तरमा उपचार सम्भव नभएका ६ जना घाइतेलाई बिहान साढे ८ बजे नेपाली सेनाको हेलिकप्टरमार्फत थप उपचारका लागि काठमाडौं पठाइएको छ ।
घटनास्थलमा सशस्त्र प्रहरी बलको बीओपी तिप्लिङबाट सशस्त्र प्रहरी निरीक्षक सुनिलकुमार कार्कीको कमान्डमा सुरक्षा टोली खटिएको छ ।
पोषनाथ अधिकारी कान्तिपुर मिडिया ग्रुपका धादिङ संवाददाता हुन् ।