उनले देश विकास र नीति निर्माणमा बहस हुनुपर्ने सिंहदरबारमा कर्मचारीलाई घण्टौँ थुनेर यातना दिइएको तथा संस्थागत विधि कमजोर पारिएको बताए ।
पाँचथर — प्रतिनिधिसभामा प्रमुख प्रतिपक्षी दलका नेता भीष्मराज आङ्देम्बेले सिंहदरबार देश विकास र नीति निर्माणको बहसभन्दा कर्मचारीलाई थुनेर यातना दिने थलो बन्न थालेको आरोप लगाएका छन् ।
स्वार्थ समूहको इसारामा कर्मचारी प्रशासनलाई चलाउन खोजिएको भन्दै उनले सरकारको कार्यशैलीप्रति असन्तुष्टि जनाएका हुन् ।
पाँचथर बहुमुखी क्याम्पसको तेस्रो क्याम्पस सभालाई सोमबार सम्बोधन गर्दै आङ्देम्बेले भने, ‘सिंहदरबार यातनागृहजस्तो भइसक्यो । त्यहाँ देश विकास र नीति निर्माणका विषयमा बहस र चिन्तन हुँदैन, बरु कर्मचारीलाई घण्टौँ थुनेर यातना दिँदै स्वार्थ समूहको इसारामा चलाउन खोजिन्छ ।’
उनले सरकार नागरिकका मुद्दा र जनताका आवश्यकताप्रति गम्भीर नरहेको आरोप पनि लगाए । सरकार मुलुकका प्रमुख समस्या समाधानमा केन्द्रित हुनुपर्नेमा न्यायालय र प्रहरी प्रशासनलाई समेत आफ्नो मुठ्ठीमा राख्ने प्रयास गरिरहेको उनको भनाइ थियो ।
सरकार न पार्टीको अधीनमा रहेको न संसदीय दलका निर्णय नै मान्ने अवस्थामा पुगेको टिप्पणी गर्दै उनले राज्य सञ्चालनमा संस्थागत पद्धति र विधिको पालना हुनुपर्नेमा जोड दिए ।
आङ्देम्बेले पाँचथर बहुमुखी क्याम्पसलाई आंगिक क्याम्पस बनाउन सबै पक्ष एकजुट भएर लाग्नुपर्ने बताए । क्याम्पसको शैक्षिक तथा संस्थागत विकासका लागि राजनीतिक दल, जनप्रतिनिधि र सरोकारवालाबीच साझा समझदारी आवश्यक रहेको उनको भनाइ थियो ।
क्याम्पस सभामा शैक्षिक वर्ष २०८२/०८३ को स्नातक तहको अन्तिम सेमेस्टरमा उत्कृष्ट नतिजा हासिल गर्ने चार विद्यार्थीलाई पुरस्कृत गरिएको थियो ।
लक्ष्मी गौतम कान्तिपुरका पाँचथर संवाददाता हुन् ।