कपिलवस्तु, महाराजगन्ज र कृष्णनगर नगरपालिका तथा यशोधरा र मायादेवी गाउँपालिकाले शुक्रबार शोक बिदा दिएका हुन् ।
कपिलवस्तु — कपिलवस्तु नगरपालिकाका पूर्वनगर प्रमुख रामदास गुप्तको निधनमा जिल्लाका ५ स्थानीय तहले शुक्रबार शोक बिदा दिएका छन् ।
कपिलवस्तु, महाराजगन्ज र कृष्णनगर नगरपालिका तथा यशोधरा र मायादेवी गाउँपालिकाले शुक्रबार शोक बिदा दिएका हुन् ।
उक्त नगरपालिका र गाउँपालिकाका प्रमुख तथा अध्यक्षद्वारा प्रकाशित शोक विज्ञप्तिमा जिल्लाले विकासप्रेमी र असल अभिभावक गुमाएको भन्दै दुःख व्यक्त गर्दै परिवारप्रति समवेदना व्यक्त गरेका छन् ।
स्वच्छ छविका नेताका रूपमा स्थापित गुप्तको निधनले अपूरणीय क्षति पुगेको भन्दै उनको अभाव सधैं रहिरहने उल्लेख गरेका छन् । शुक्रबार स्थानीय तहले सम्पूर्ण वडा कार्यालय, स्वास्थ्य संस्था (अत्यावश्यक सेवाबाहेक) तथा सामुदायिक, संस्थागत र धार्मिक शिक्षण संस्थामा शोक बिदा दिएको जनाएका छन् ।
२०२७ सालदेखि राजनीति गर्दै आएका गुप्त २५ वर्षभन्दा बढी समय कपिलवस्तु नगरपालिकाको नेतृत्वमा रहेका थिए । २०३९ सालमा तौलिहवा नगर पञ्चायत स्थापना भएपछि उनी नगरप्रमुखमा निर्वाचित भएका थिए । ०४३ सालमा पनि उनी नगर पञ्चायतको नगरप्रमुखमा निर्वाचित भएका थिए । त्यसैगरी, २०४८ र २०५४ सालमा कपिलवस्तु नगरपालिकाको नगरप्रमुखमा निर्वाचित भएका थिए । २०७४ सालको स्थानीय तह निर्वाचनमा समेत मेयर पदका उम्मेदवार बनेका उनी पराजित भएका थिए ।
लामो समयदेखि मधुमेह, उच्च रक्तचापलगायतका रोगबाट पीडित ८२ वर्षीय गुप्ताको कपिलवस्तु नगरपालिका–२ जमुहावारस्थित आफ्नै निवासमा बिहीबार बिहान ६ बजे निधन भएको उनका छोरा अखिलेश गुप्तले बताए । उनको दाहसंस्कार शुक्रबार गर्ने बताइएको छ ।
मनोज पौडेल लुम्बिनीस्थित कान्तिपुर संवाददाता हुन् ।
.jpg)
