भारतबाट तिहार मनाउन घर फर्किरहेका ५३ वर्षीय हरिश भण्डारी महेन्द्रनगरबाट दार्चुला जाँदै गरेको बसमा अचेत अवस्थामा भेटिएका थिए ।
बैतडी — तिहारका लागि भारतबाट घर फर्किरहेका बैतडीको पाटन नगरपालिका–६ भीटाका ५३ वर्षीय हरिश भण्डारीको बसभित्रै मृत्यु भएको छ ।
महेन्द्रनगरबाट दार्चुलातर्फ आउँदै गरेको सुपप्र ०२–००१ ख १०३१ नम्बरको बसमा बेहोस अवस्थामा भेटिएका भण्डारीको मृत्यु भएको हो ।
भण्डारी महेन्द्रनगरबाट बस चढेका थिए । सोमबार राति करिब साढे १२ बजे पाटन पुगेका भण्डारी बसभित्रै अचेत अवस्थामा भेटिएका थिए । उनलाई तत्काल उपचारका लागि प्राथमिक स्वास्थ्य केन्द्र पाटन लगिएको थियो ।
पाटनमा प्राथमिक उपचारपछि थप उपचारका लागि जिल्ला अस्पताल बैतडी रिफर गरिएका भण्डारीलाई मंगलबार बिहान चिकित्सकले मृत घोषणा गरेको इलाका प्रहरी कार्यालय पाटनले जनाएको छ ।
भण्डारीको मृत्यु के-कति कारणले भएको हो भन्ने पोस्टमार्टमपछि मात्रै खुल्ने प्रहरीले जनाएको छ । मृतक भण्डारीको शव पोस्टमार्टमका लागि जिल्ला अस्पताल बैतडीमा राखिएको छ । मृतक भण्डारीको घरमा श्रीमती, एक छोरा र एक छोरी रहेका छन् ।
घटनाका विषयमा थप अनुसन्धान भइरहेको जिल्ला प्रहरी कार्यालयले जनाएको छ ।
मोहन चन्द कान्तिपुरका बैतडी संवाददाता हुन् ।
