सोरुकोटबाट तारापानीतर्फ भैलो खेल्ने टोली लिएर जाँदै गरेको जिप दिउँसो ब्रेक फेल भएर सडकको भित्तामा ठोक्किँदा दुर्घटना भएको हो ।
मुगुको सोरु गाउँपालिका–६ गजेडीस्थित झ्यालेखोलामा जिप दुर्घटना हुँदा पाँच जना घाइते भएका छन् ।
सोरुकोटबाट तारापानीतर्फ भैलो खेल्ने टोली लिएर जाँदै गरेको बा १८ च ४१८ नम्बरको जिप मंगलबार दिउँसो १ बजे ब्रेक फेल भएर सडकको भित्तामा ठोक्किँदा दुर्घटना भएको हो ।
जिल्ला प्रहरी कार्यालय मुगुका प्रमुख डीएसपी रविराज थपलियाका अनुसार जिपमा सवार १२ जनामध्ये पाँच जना घाइते भएका छन् ।
घाइते हुनेमा जिप चालक मुगुको खत्याड गाउँपालिका–७ का २९ वर्षीय उपेन्द्र परियार, सोरु गाउँपालिका–९ कालैका १९ वर्षीय गणेश ऐडी, १६ वर्षीया निर्मला ऐडी, १७ वर्षीया करिस्मा ऐडी र १९ वर्षीय अन्तिम योगी छन् । उनका अनुसार गणेशको अवस्था गम्भीर छ । उनको टाउको र निधारमा चोट लागेको छ । चालक परियारको दायाँ हात र बायाँ खुट्टामा चोट लागेको छ । निर्मलाको कुम र छातीमा, करिस्माको कम्मर र छातीमा तथा योगीको टाउको र बायाँ खुट्टामा चोट लागेको छ ।
प्रहरी टोलीले घाइते पाँचै जनाको उद्धार गरी उपचारका लागि सिपस्थित जिमा स्वास्थ्य चौकी पठाएको डीएसपी थपलियाले बताए ।
ज्योति कटुवाल कान्तिपुरकी सुर्खेत संवाददाता हुन् ।
