कोल्टी अस्पतालका चिकित्सकले शिशुलाई सघन उपचार आवश्यक रहेको बताएपछि नेपाली सेनाको हेलिकप्टरमार्फत कर्णाली प्रादेशिक अस्पताल सुर्खेत लगिएको हो।
बाजुरा — जिल्लाको बुढीनन्दा नगरपालिकामा रहेको कोल्टी आधारभूत अस्पतालबाट आइतबार सुत्केरी आमासहित नवजात शिशुको नेपाली सेनाको हेलिकप्टरमार्फत उद्धार गरिएको छ ।
कोल्टी आधारभूत अस्पतालमा सुत्केरी भएकी मुगुको खत्याड गाउँपालिका–९ बस्ने २० वर्षीया देवकी खड्का र नवजात शिशुलाई हेलिकप्टरमार्फत उद्धार गरिएको बाजुराका प्रमुख जिल्ला अधिकारी मुक्तिराम रिजालले बताए ।
नवजात शिशुको श्वास प्रश्वासमा समस्या देखिएपछि सघन उपचार कक्ष(आइसीयु)मा राखेर उपचार गर्नुपर्ने अवस्था आएकाले सेनाको हेलिकप्टरमार्फत उद्धार गरिएको प्रमुख जिल्ला अधिकारी रिजालले जानकारी दिए ।
नवजात शिशुको ज्यान जोखिममा भएको कोल्टी आधारभूत अस्पतालका चिकित्सकले सघन उपचार कक्ष(आइसीयू)मा राखेर उपचार गर्न सुझावसहित रिफर गरेकोले महिला, बाललबालिका, लैङ्गिक तथा यौनिक अल्पसंख्यक र सामाजिक सुरक्षा मन्त्रालयको राष्ट्रपति महिला उत्थान कार्यक्रममार्फत सुत्केरी र नवजात शिशुको उद्धार गरिएको प्रजिअ रिजालले बताए।
खड्काको पेटमा बच्चा उल्टो अवस्थामा नवजात शिशुको जन्मिए पनि श्वासप्रश्वासमा समस्या आएकाले कोल्टीबाट हेलिकप्टरमार्फत कर्णाली प्रादेशिक अस्पताल सुर्खेत लगिएको हो ।
गत बिहीबार पनि जिल्ला अस्पताल बाजुरामा सुत्केरी भएकी एक महिलाको नेपाली सेनाको हेलिकप्टर मार्फत उद्धार गरिएको थियो । त्रिवेणी नगरपालिका–७ की २४ वर्षीया जलु कुमारी भण्डारी(रावत) लाई नेपाली सेनाको हेलिकप्टर मार्फत उद्धार गरिएका हो । सुत्केरी भएकी भण्डारी (रावत)लाई रक्तश्राव र मुर्छा पर्ने समस्या देखिएकाले तत्काल हेलिकप्टरमार्फत उद्धार गरिएको थियो ।
