छठ पर्वको अवसरमा रास्वपाले बिहीबार आयोजना गरेको कार्यक्रममा झडप भएको थियो । असलमका अनुसार उनीसहित चार जना घाइते भएका छन् भने तीन जनाको हात भाँचिएको छ ।
बारा — बाराको जितपुरसिमरा उपमहानगरपालिका भलुहीमा बिहीबार भएको झडपमा घाइते भएका राष्ट्रिय स्वतन्त्र पार्टी (रास्वपा) का कार्यकर्ताले उपचार र न्यायको माग गरेका छन् । उनीहरूले आफ्ना नेता तथा पार्टीका सांसदसमेत रहेका बारा निर्वाचन क्षेत्र नम्बर ४ का प्रतिनिधिसभा सदस्य रहबर अन्सारी र प्रहरी प्रशासनसँग यस्तो माग गरेका हुन् ।
'माननीय सांसदज्यू अस्पतालमा भेट्न आउनुभएको छैन । उहाँले हाम्रो न्याय र उपचारका लागि पहल गरिदिनुपर्यो,' वीरगन्जस्थित हेल्थकेयर अस्पतालमा उपचाररत पूर्ववडाध्यक्ष असलम देवानले भने ।
छठ पर्वको अवसरमा रास्वपाले बिहीबार आयोजना गरेको कार्यक्रममा झडप भएको थियो । असलमका अनुसार उनीसहित चार जना घाइते भएका छन् भने तीन जनाको हात भाँचिएको छ ।
'मलाई लक्षित गरेर आक्रमण गरियो । हाम्रो र विपक्षी समूहका गरी सिमरा र वीरगन्जमा १६ जना पक्राउ परेका हुन्,' उनले भने ।
उनका अनुसार अस्पतालमा उपचार गराइरहेका आफू र साथीहरूमाथि समेत विपक्षी सुवास मन्सुरी समूहका व्यक्तिहरू कुटपिट गर्ने मनसायले प्रस्तुत भएपछि उनका समर्थकले प्रतिरक्षा र प्रतिवाद गरेका थिए । त्यसपछि वीरगन्ज प्रहरीले नौ जनालाई पक्राउ गरेको उनले बताए ।
पक्राउ परेकाहरूलाई छुटाउन र सिमरामा पक्राउ परेका विपक्षी मन्सुरीसहित सात जनामाथि कानुनी कारबाही गर्न पनि उनले माग गरेका छन् । साथै घाइतेहरूको उपचारको व्यवस्था मिलाउन उनले आग्रह गरेका छन् ।
सुवास मन्सुरी सिमरा प्रहरी हिरासतमा रहेको र उनी नेकपाका कार्यकर्ता भएको असलमले बताए । झडपको मुख्य योजनाकार मन्सुरी नै भएको उनको आरोप छ ।
आफू वडाध्यक्ष रहेका बेला विद्यालय निर्माणमा अनियमितता भएको भन्ने विषयलाई जोडेर विपक्षीले व्यक्तिगत इगो साँधेको असलमको भनाइ छ । सांसद सहभागी चियापान कार्यक्रममा मन्सुरी पक्षले यो विषय उठाएको र पछि सामसुम भएको उनले बताए । त्यसपछि गाउँमा मन्सुरीसहितका व्यक्तिले हेलमेट र बाँसको भाटाले आफूमाथि आक्रमण गरेको उनको आरोप छ ।
इलाका प्रहरी कार्यालय सिमराका प्रहरी नायब उपरीक्षक दयाकृष्ण भट्टले पक्राउ परेका मन्सुरीसहित सात जनामाथि अनुसन्धान भइरहेको बताए ।
चियापान कार्यक्रममा दुई पक्षबीच सामान्य भनाभन भएको र सांसद रहबर अंसारी बाहिरिएपछि गाउँमा झडप भएको थियो ।
लक्ष्मी साह कान्तिपुरका बारा संवाददाता हुन् ।
